Լուսանկարը՝ Armeniasputnik-ի
Հայաստանի պաշտպանության նախարարությունը հայտնել է, որ զգալիորեն լուծվել են սպառազինության մատակարարմանն առնչվող հայ-ռուսական խնդիրները, թեեւ դեռ կան լուծման սպասող հարցեր: Պաշտոնական Երեւանը վերջին օրերին մի քանի մակարդակով հայտարարեց, որ այն, այսպես ասած չմատակարարված ռուսական սպառազինության մի զգալի մասը արդեն Երեւանում է:
Ի՞նչ է տեղի ունեցել, Ռուսաստանը բարելավելով իր դիրքերը ուկրաինական ճակատում, կասեցնելով եւ փաստացի տապալելով ուկրաինական հակահարձակումը, նաեւ բազմապատկելով ներքին ռազմաարդյունաբերական արտադրաանքի ծավալը, կարողացել է «մարե՞լ» Հայաստանին ունեցած սպառազինական պարտքը, թե՞ որոշել է անել դա աշխարհաքաղաքական իրողություններից ու հանգամանքներից ելնելով, որոնք կարող են կապված լինել տարբեր հարցերի հետ, սկսած ռուս-թուրքական հարաբերությունից, մինչեւ ռուս-իրանական հարաբերություն եւ մերձավորարեւելյան իրավիճակ:
Անկասկած է, որ Մոսկվան ու Թեհրանը օրեր առաջ ունեցան բավականին լուրջ քննարկումներ, ինչի վկայություն էր այն, որ նույն օրը հեռախոսազրույց է տեղի ունեցել երկու երկրների թե պաշտպանության նախարարների, թե արտաքին գործերի նախարարների մակարդակով: Դրանցից ժամեր անց Իրանը բալիստիկ հրթիռներով անմիջականորեն՝ Իսլամական հեղափոխության պահապանների կորպուսի միջոցով հարվածներ է հասցրել Իրաքի ու Պակիստանի տարածքներում գործող թե ահաբեկչական խմբավորումների, թե իսրայելական հետախուզության «բջիջներին», ըստ Թեհհրանի տարածած հաղորդագրության:
Սա ըստ էության նշանակում էր, որ Թեհրանը Մերձավոր Արեւելքում ծավալվելիք իրադարձություններում պատրաստվում է լինել բավականին կոշտ եւ աննահանջ: Իսկ այստեղ շատ կարեւոր է դառնում Իրանի թիկունքը՝ Կովկասը: Հնարավոր է, որ Իրանը Մերձավոր Արեւելքում ստանձնելով կոշտ դիրքորոշման հանձնառություն, ինչը նշանակելու է, որ արեւմտյան ուշադրությունը կշարունակի գամված մնալ հենց այդ ուղղությամբ եւ զգալիորեն կշարունակի շեղվել Ուկրաինայից, ի պատասխան Ռուսաստանից ակնկալել է հավաստիացում, որ Մոսկվան համարժեք եւ համոզիչ քայլեր կձեռնարկի Իրանի թիկունքում անակնկալներ թույլ չտալու համար:
Հավանական է, որ Հայաստանին սպառազինության մատակարարումը տեղի է ունեցել հենց այդ տրամաբանության շրջանակում, որի մաս է հնարավոր դիտել եւ այն հայտարարությունները, որ արեց ՌԴ արտգործնախարար Լավրովը այն մասին, որ եռակողմ պայմանավորվածություններում չի եղել որեւէ «միջանցքային» պայմանավորվածություն:
