«Խորհրդային տարիներին պետական համակարգում զգալիորեն քիչ աշխատողներ կային, քան ներկայում: Սա նշանակում է, որ պետական համակարգը դառնում է էլ ավելի անարդյունավետ»,- «Առաջին լրատվականի» հետ զրույցում նման տեսակետ հայտնեց կառավարման փորձագետ Հարություն Մեսրոբյանը:
Նրա խոսքով, աշխարհում շատ լավ օրինակ կա՝ Նոր Զելանդիայի կառավարման համակարգը, որտեղ 2 փուլով բարեփոխումներ արվեցին և բավականին կրճատվեց պետական համակարգում աշխատող մարդկանց քանակը: Վրաստանում այժմ նույնն են անում՝ կրճատում են պետական կառավարման համակարգը: Վրաստանի համեմատ, ՀՀ կառավարման համակարգը 2-3 անգամ ավելի մեծ է:
Պետական կառավարման համակարգի կրճատումը մի քանի խնդիրներ է լուծում՝ պետությունը դառնում է առավել արդյունավետ այն իմաստով, որ կարելի է հրավիրել լավ մասնագետների բարձր վարձավճարով, քանի որ պետական կառավարման համակարգը կրճատելիս բյուջեում լրացուցիչ գումարներ են հայտնվում: Հ.Մեսրոբյանի կարծիքով, ՀՀ-ում պետական կառավարման մասով լուրջ փոփոխություններ պետք է արվեն, հատկապես իրավապահ մարմիններում, ինչպես դա արվեց Վրաստանում:
«Մեզ մոտ շատ ուժեղ գործում է Պարկինսոնի օրենքը՝ ցանկացած բյուրոկրատական համակարգ սկսում է իրեն վերարտադրել լայնանալով, մեծանալով թե՛ ծավալներով, թե՛ քանակով: Մեզ մոտ վերջին 20 տարիներին Պարկինսոնի օրենքը փայլուն աշխատում է»,- փաստեց Հ.Մեսրոբյանը:
