Anadolu պետական գործակալությունը, հղում անելով Թուրքիայի նախագահի գրասենյակին, հայտնում է, որ Ռեջեփ Թայիփ Էրդողանը հեռախոսազրույց է ունեցել Եգիպտոսի նախագահ Աբդել Ֆաթեհ աս-Սիսիի հետ, քննարկվել է «պաղեստինյան հողերի դեմ Իսրայելի հարձակումը եւ Գազայի հատված մարդասիրական օգնություն հասցնելու հարցը»: Էրդողանը Եգիպտոսի նախագահին ասել է, որ Պաղեստինի հարցում իսկամական երկրները պետք է հանդես գան միասնական դիրքերից: Նա աս-Սիսիին շնորհավորել է Եգիպտոսի նախագահ ընտրվելու կապակցությամբ եւ հույս հայտնել, որ հեռախոսազրույցը երկու երկրների հարաբերությունների նոր էջ կբացի:
Եգիպտոսում «Մուսուլման եղբայրների» իշխանությունը տապալելուց, հարյուրավոր իսլամ ծայրահեղականների ձերբակալությունից եւ դատավարությունից հետո, որ իրականացվել է աս-Սիսիի կողմից, թուրք-եգիպտական հարաբերություններում սառնությունը պահպանվում է: Այդ համատեքստում Էրդողանի հեռախոսազանգը չափազանց ուշագրավ է, եթե նկատի ունենանք, որ Գազայի հատվածում ռազմագործողություն սկսելուց ի վեր Իսրայելի կառավարությունը տարածաշրջանի արաբական երկրներից թերեւս միայն Եգիպտոսի հետ է որոշակի կապեր պահպանում:
Reuters-ը տեղեկագրում է, որ Կահիրեում մեկնարկել են ՀԱՄԱՍ-ի քաղաքական թեւի եւ Իսրայելի պաշտոնական ներկայացուցիչների բանակցությունները, որ ընթանում են Եգիպտոսի Զինված ուժերի ռազմական հետախուզության բարձրաստիճան պաշտոնյայի միջնորդությամբ: Եգիպտոսի վերընտրված նախագահը պրոֆեսիոնալ զինվորական է, ժամանակին գլխավորել է երկրի ռազմական հետախուզությունը եւ, ամենայն հավանականությամբ, անձամբ է վերահսկում իսրայելա-պաղեստինյան քննարկումները: Բրիտանական գործակալության տեղեկացվածությամբ՝ հավանական է, որ կողմերը «հասնեն մեկշաբաթյա մարդասիրական հրադադարի եւ պատանդների ու իսրայելական բանտերում պատիժ կրող պաղեստինցիների փոխանակման համաձայնության»:
Պաղեստինի հարցում իսլամական երկրների միասնական դիրքորոշում որդեգրելու մասին Եգիպտոսի նախագահին Էրդողանի հղած ազդակն, ըստ երեւույթին, թափանցիկ ակնարկ է, որ Թուրքիան տեղյակ է Կահիրեում իսրայելա-պաղեստինյան բանակցություններից, եւ Եգիպտոսի միջնորդությունը համարում է «իսլամական համերաշխության խախտում»: Թուրքիայի նախագահի գրասենյակը ոչինչ չի փոխանցել Եգիպտոսի նախագահի պատասխան խոսքից: Կարելի է ենթադրել, որ աս-Սիսիի արձագանքն այնքան էլ հաճելի չի եղել, հակառակ դեպքում Էրդողանի մամուլի ծառայությունը որեւէ սկզբունքային մեջբերում կաներ:
Դժվար է միանշանակորեն գնահատել՝ Թուրքիան փորձում է ձախողե՞լ իսրայելա-պաղեստինյան բանակցությունները եւ տապալել հնարավոր համաձայնությունները, թե՞ ձգոտւմ է միանալ աս-Սիսիի նախաձեռնությանը: Թուրքիայի նախագահի եւ Իսրայելի վարչապետի հարաբերությունները խզված են: Բացառված չէ, որ Եգիպտոսի նախագահին «շնորհ անելու» Էրդողանի քայլը Վաշինգտոնին ուղղված ազդակ է: Ամեն դեպքում Էրդողանը, կարծես, մերձավորարեւելյան դիվանագիտական գամբիտ է սկսելլ:
