Սփյուռքի նախարարությունը սեպտեմբերի 19-21-ը կազմակերպելու է սփյուռքի կազմակերպությունների ղեկավարների ու ներկայացուցիչների համահայկական համաժողով, որի ընթացքում կլինեն նիստեր, քննարկումներ: Ամսի 19-ին Թուրքիայից կժամանի Դալար համույթը: Համաժողովը, սակայն, ըստ էության, մեկնարկում է այսօր` Նկարիչների միությունում բացված Համահայկական ցուցահանդեով: Այս մասին այսօր լրագրողների հետ հանդիպմանն ասաց ՀՀ սփյուռքի նախարարության համահայկական ծրագրերի վարչության պետ Ատոմ Մխիթարյանը: Համաժողովի մասնակիցները կմասնակցեն նաև ամսի 20-ին Օղակաձև զբոսայգու չորրորդ հատվածում բացվելիք Հայ բարերարների ճեմուղու բացմանը: Համաժողովն ընդունելու է ազգային հռչակագիր, որի հիմնական խնդիրները հինգն են` Հայաստանի հզորացում, ԼՂՀ խաղաղ կարգավորում, Ցեղասպանության ճանաչում, Հայապահպանություն ու պայքար ուծացման դեմ, Հայ եկեղեցու ամրապնդում: Սեպտեմբերի 21-ին Համաժողվի մասնակիցները ներկա կգտնվեն Հանրապետության հրապարակում կազմակերպվելիք միջոցառումներին: 21-ին կբացվի Հայ ոսկերիչների ցուցահանդես:
ՀՀ սփյուռքի նախարարության ԱՊՀ երկրների համայնքների վարչության պետ Անդրանիկ Արշակյանն էլ հավելեց, որ համաժողովը երեք հիմնական նպատակ ունի: Այն աննախադեպ է ոչ միայն հայկական սփյուռքի տարեգրության մեջ, սա առաջին դեպքն է, երբ փորձում ենք համախմբել հայության բոլոր հատվածներին: «Ֆինանսական ծախսերի մի մասը հոգում է պեությունը, մի մասը` մասնակիցները»-, ասաց Ատոմ Մխիթարյանը` հավելելով, որ սա որոշակի առումով շարունակությունն է Հայաստանում կազմակերպված Հայաստան-Սփյուռք համաժողովների: Պետությունը տրամադրել է քսան միլիոն դրամ համաժողովի աշխատանքների կազմակերպման համար:
Համաժողովի նիստերը տեղի են ունենալու Մարզահամերգային համալիրի սրահներում:
