Ինչպես հաղորդում է չինական Xinhua լրատվական գործակալությունը, Սաուդյան Արաբիայի արքայազն, միլիարդատեր Վալիդ բեն Թալալը հայտարարել է, որ 2012 թ. սկսվում է արաբական շուրջօրյա լրատվական հեռուստաալիքի հեռարձակումը:
Ելույթ ունենալով մամուլի ասուլիսի ժամանակ՝ նա ասել է, որ հեռուստաալիքը լուսաբանելու է հիմնականում արաբական աշխարհում տեղի ունեցող զարգացումները, ինչպես նաև փոխանցելու է տեղեկատվություն, որը հիմնված է արդարության և արժանահավատության սկզբունքի վրա: Արքայազնը նշել է, որ ինքը պայմանագիր է ստորագրել Bloomberg լրատվական գործակալության հետ համագործակցելու վերաբերյալ: Բացի այդ, հեռուստաալիքը հեռարձակելու է նաև տնտեսական հաղորդումներ:
Մասնագետները նշում են, որ նոր հեռուստաալիքը մրցակցության մեջ կմտնի Al-Arabia էմիրաթական և Al-Jazeera քաթարյան հայտնի հեռուստաալիքների հետ: Նշվում է նաև, որ Վալիդ բեն Թալալը մասնաբաժին ունի սկանդալներով հայտնի Ռուպերթ Մերդոքի մեդիակորպորացիայում:
