Իսրայելական IzRus պորտալին տված հարցազրույցի ժամանակ Ռուսաստանի, Եվրասիայի և միջազգային էներգետիկ քաղաքականության հարցերով Heritage («Ժառանգություն») հիմնադրամի առաջատար փորձագետ, պետդեպարտամենտի նախկին խորհրդական Արիել Քոհենն անդրադարձել է թուրք-իսրայելական ճգնաժամին՝ ընդգծելով, որ Էրդողանը Հայաստանին պատմական հնարավորություն է ընձեռել՝ կարգավորելու իր հարաբերություններն Իսրայելի հետ.
«Թուրքերն իրենց ձեռքով փչացրին տարածաշրջանում իրենց միակ կայուն գործընկերոջ հետ հարաբերությունները։ Ընդ որում՝ դա տեղի է ունենում այն ժամանակ, երբ նրանց «զրո խնդիր հարևանների հետ» քաղաքականությունը չար կատակ է խաղում իրենց իսկ գլխին։ Թուրքիան իր ողջ սահմանի երկայնքով խնդիրներ ունի հարևանների հետ. Իրանի հետ, Իրաքում քրդերի հետ, վրացիների հետ Աբխազիայի պատճառով, Սիրիայի հետ։
Առանց Հրեական լոբբիի ամեն տեսակ ճնշումների էլ թուրքերի դիրքերը գնալով թուլանում են ԱՄՆ-ի կողմից 1915 թվականի Հայոց ցեղասպանության ճանաչման հարցում։ Կոնգրեսի կողմից Հայոց ցեղասպանության ճանաչումը ժամանակի հարց է։ Իսկ երբ դա տեղի ունենա, թուրքական կողմին կարելի կլինի ճնշել հայերի կողմից փոխհատուցման պահանջներով։ Այդպիսով, կորցնելով Իսրայելին՝ որպես այդ հարցում իր դաշնակցի, Թուրքիան ռիսկի է դիմում ստանալ շատ ուժեղ տնտեսական հարված։
Այսօր Հայաստանը բացառիկ պատմական հնարավորություն է ստացել՝ կարգավորելու իր հարաբերությունները Երուսաղեմի հետ։ Սակայն նա պետք է հասկանա, որ Իսրայելը չի ցանկանա խզել իր հարաբերություններն Ադրբեջանի հետ։ Դա նրան ձեռնտու չէ։ Դրա համար էլ միայն համբերատարություն ու ըմբռնողականություն ցուցաբերելով՝ Երևանը կարող է հասնել Իսրայելի հետ հարաբերությունների կարգավորմանն ու սերտացմանը»։
