Ադրբեջանական Trend լրատվական գործակալությանը տված հարցազրույցի ժամանակ «Ազատության նավատորմ»-ի ներկայացուցիչ և IHH մարդկային օգնության հիմնադրամի անդամ Հուսեին Օրուջը հայտարարել է, որ թուրքական կողմը բանակցություններ է վարում «Ազատության նավատորմ 2»-ի կազմակերպիչ երկրների հետ՝ դեպի Գազայի հատված երկրորդ հումանիտար քարավանի առաքման համար.
«Այս անգամ «Ազատության նավատորմ 2»-ին մասնակցելու են 22 հասարակական կազմակերպություններ։ Հենց որ թուրքական կողմը կպայմանավորվի «Ազատության նավատորմ»-ի մասնակից երկրների հետ, հումանիտար օգնությունը կուղարկվի Գազա։ Քարավանն ուղարկելու կոնկրետ ժամկետը դեռ հայտնի չէ։
Հումանիտար բեռները Գազա հասցնելը լիովին օրինական է, մինչդեռ միջազգային հանրությունը պետք է հանցագործություն որակի հումանիտար նավերի վրա իսրայելական ռազմանավերի հարձակումը, որի ընթացքում զոհվել են Թուրքիայի 9 քաղաքացիներ։
Դրա համար էլ բնական ու օրինական է թուրքական իշխանությունների այն քայլը, որ այսուհետ թուրքական ռազմանավերն ուղեկցելու են Գազա մեկնող հումանիտար քարավաններին։ Դա կկանխի իսրայելական հատուկջոկատայինների կողմից քարավանի վրա հնարավոր հարձակումը։ Մենք լիովին պաշտպանում ենք իշխանությունների այդ որոշումը»։
Հիշեցնենք, որ օրեր առաջ հրապարակված «Ազատության նավատորմ»-ի մասին ՄԱԿ-ի հանձնաժողովի զեկույցում Իսրայելի կողմից Գազայի հատվածի ծովային շրջափակումը որակվել էր օրինական, սակայն միևնույն ժամանակ նշված էր, որ իսրայելական հատուկջոկատայինները չափից ավելի ուժ են կիրառել «Ազատության նավատորմ»-ի գրավման ժամանակ։
