Այս տարի, նախորդ տարվա համեմատ, 40-50%-ով քիչ հայ զբոսաշրջիկներ են մեկնել Վրաստանի հանգստավայրեր: Ինչպես «Առաջին լրատվականին» հայտնեց «Նատուրա տուր» գործակալության հիմնադիր-տնօրեն Էդուարդ Գևորգյանը, դրան նպաստել է վրացական լողափերի որպես տուրիստական ապրանքի հանդեպ հայերի հետաքրքրության նվազումը:
«Հայ զբոսաշրջիկների հետաքրքրությունն իր պիկին հասավ անցած տարի, շատերը բավարարվել են և այլ ապրանք են փնտրում»,- ասաց Է.Գևորգյանը` հավելելով, որ դրան նպաստել է նաև գների բարձրացումը. «Անցած տարվա համեմատ, Վրաստանում 1-1.5 անգամ ամեն-ինչ թանկացել է: Հավանաբար, այդ պատճառով էլ ավելի քիչ են գնացել»:
Միաժամանակ Է.Գևորգյանը նշեց, որ փոխարենը՝ ՀՀ քաղաքացիները այլ հանգստավայր նույնպես չեն գնացել: Նրա կարծիքով՝ բնակչության ընդհանուր ֆինանսական վիճակն է վատթարացել, այդ պատճառով ավելի քիչ են գնացել հանգստանալու ու ավելի քիչ են ծախսել հանգստի վրա:
Հիշեցնենք, որ նախորդ տարի սևծովյան լողափերի վրացական հատվածում հանգստացել էին շուրջ 500 հազար հայեր:
