«ՌեԱնիմանիա» 3-րդ միջազգային անիմացիոն կինոփառատոնը Սիրահարների այգում կկազմակերպի ֆիլմերի երեկոյան բացօթյա ցուցադրություններ: Ցուցադրությունները կտևեն մինչև սեպտեմբերի 19-ը: Սեպտեմբերի 14-ին կցուցադրվեն Հայկական ռետրոսպեկտիվները, սեպտեմբերի 15-ին` «Ֆանտազիա», հաջորդ օրերին`«Ֆանտազիա», «Երկաթե հսկան» ֆիլմերը: Այցելուներին անակնկալ ցուցադրություն է սպասվում սեպտեմբերի 18-ին, իսկ վերջին օրը կցուցադրվի հաղթող ֆիլմը: Ֆիլմերի սկիզբը ժամը 21:00-ին է:
Հանդիսատեսը կարող է անիմացիոն ֆիլմեր դիտել նաև «Նաիրի» կինոթատրոնում: Վաղը կարող են դիտել «Առաջին ջոկատ. ճշմարտության պահը» ֆիլմը, սեպտեմբերի 16-ին` «Երկաթե հսկան», սեպտեմբերի 17-ին` «Մարկ Տվենի արկածները» ֆիլմը:
Բացի այդ` կինոփառատոնի շրջանակում հատուկ բրազիլական անիմացիայի սիրահարների համար կցուցադրվեն բրազիլական անիմացիայի նմուշներ:
«Արաբական գիշերների» սիրահարները հնարավորություն կունենան սեպտեմբերի 15-ին և 18-ին դիտել արաբական ֆիլմեր և «Հեղափոխական անիմացիա արաբական աշխարհից» խորագրով ֆիլմեր:
Փառատոնի շրջանակում ցուցադրություններ կլինեն նաև Մոսկվայի տանը, Նարեկացի արվեստի միությունում ու Փոքր թատրոնում: