News Georgia-ի փոխանցմամբ՝ Վրաստանի պատրիարք Իլյա 2-րդը կիրակնօրյա պատարագից հետո դիմել է ներկաներին. «Եթե Վրաստանը պահպանի Ուղղափառ հավատը, ապա երկիրը կփրկվի։ Մարդկային բնավորությունը շատ բարդ է, մարդը կարող է դժոխքից բարձրանալ դեպի դրախտ և հակառակը։
Այսօր մենք ևս մեկ անգամ ենք մտածում, թե ուր ենք գնում, և ով կլինենք ապագայում։ Վրաց ժողովուրդը պետք է միշտ հիշի, որ Ուղղափառ հավատը, որը պահպանվել է մեր նախնիների կողմից, ամենակարևորն է Վրաստանի համար։ Աստծու կողմից վրացուն շնորհված բարությունը, սերը, աջակցությունն ու օգնությունը, որոնց կարիքը զգում է մարդը, ինչպես նաև ներումը – այս ամենն անհրաժեշտ է պահպանել։ Այս դեպքում Վրաստանը կփրկվի»։
Հիշեցնենք, որ հուլիսի կեսերին էլ Իլյա 2-րդ հայտարարել էր. «Մենք պետք է հիշենք, որ մեր հովանավորը Սուրբ Ուղղափառ եկեղեցին է։ Նա, ով կնվաստացնի եկեղեցուն, անպայմանորեն կպատժվի։
Եկեղեցին կպաշտպանի ու կհովանավորի ազգին։ Բարձրյալը պաշտպանում ու պահպանում է տեսանելի և անտեսանելի թշնամիներից։ Պատմականորեն եկեղեցին մշտապես պաշտպանել է Վրաստանը, եկեղեցին եղել և մնում է որպես մեծ ուժ, և այդ ուժն ուղղված չէ որևէ մեկի դեմ։ Այդ ուժը նրա համար է, որպեսզի մարդն իրեն երջանիկ զգա։
Դրա համար էլ պետք է ուշադիր վերաբերվել եկեղեցուն, և այն պետք է լինի մեր սրտերում ու բանականության մեջ։ Եթե մարդը կործանել է եկեղեցին, ապա նա դրանով կործանել է իր ընտանիքն ու տունը»։
