Սաուդյան Արաբիայում իշխող կլանի ամենաակնառու և ակտիվ ներկայացուցիչներից մեկը` Թուրքի բեն Ֆայզալ Ալ-Սաուդն այսօր հոդված է հրապարակել The New York Times օրաթերթում, որտեղ զգուշացրել է ԱՄՆ-ին Պաղեստինի հարցում ունեցած սխալ քաղաքակաանության դեպքում սաուդական պատասխանի մասին:
Հոդվածը կոչվում է «Վետո կդնես՝ կկորցնես դաշնակցիդ»: Արքայազնը գրում է, որ Սաուդյան Արաբիան այլևս ի վիճակի չի լինի համագործակցել ԱՄՆ-ի հետ, եթե վերջինս վետո դնի Պաղեստինի անդամակցությանը ՄԱԿ-ին: «Արաբական երկրները զգալի փոփոխություններ են ապրում: Հատուկ հարաբերություններն ԱՄՆ-ի հետ արաբների և մուսուլմանների մեծամասնության կողմից կդիտարկվեն որպես թունավորող: Իսլամական ժողովուրդներն ազատություն են ցանկանում Պաղեստինի համար»,- գրել է Թուրքի Ալ-Սաուդը:
Արքայազնը խորհուրդ է տվել ԱՄՆ-ին, թե ամենաքիչը, որ ամերիկացիները կարող են անել այս իրավիճակում, թողնեն սաուդցիներին, եվրոպացիներին և արաբական չափավոր ռեժիմներին՝ առաջ տանելու պաղեստինցիների իրավունքները ՄԱԿ-ում: «Դրանից կպարտվեն միայն Իրանն ու Սիրիան` կուսակցություն-պետությունները, որոնք անտրտունջ աշխատել են տարածաշրջանային խաղաղության գործընթացը տապալելու համար: Սաուդյան Արաբիան վերջերս քննադատաբար է վերաբերվում Բաշար Ալ-Ասադի բռնի ռեժիմին և, ի նշան բողոքի խաղաղ ցուցարարների սպանության դեմ, հետ է կանչել իր դեսպանին Դամասակոսից: Ասադի բարբարոսական ռեժիմի անկումն անխուսափելի է: Այն զգալիորեն կթուլացնի Իրանին, որը կկորցնի արաբական աշխարհում գժտություն մտցնելու բոլոր հնարավորությունները»,- գրել է Թուրքի Ալ-Սաուդը:
