Բրիտանիան հույս ունի, որ Լիտվինենկոյի գործով կհաղթի արդարությունը: Այս մասին հայտարարել է այդ երկրի վարչապետ Դևիդ Քեմերոնը` նշելով, որ Մեծ Բրիտանիան չի ձևացնելու, թե այս հարցի շուրջ չունի տարաձայնություններ: «Մեր մոտեցումը շատ պարզ է և սկզբունքային. երբ տեղի է ունենում հանցագործություն, դրանով պետք է դատարանը զբաղվի»,- ասել է վարչապետը, որի խոսքից մեջբերում է Interfax գործակալությունը:
Հիշեցնենք, որ Լիտվինենկոյի սպանությունից հետո Մեծ Բրիտանիայի և Ռուսաստանի հարաբերությունները սրվել էին, իսկ բրիտանական քաղաքական էլիտան ընդհանրապես սահմանափակել էր բոլոր հանդիպումները Վլադիմիր Պուտինի հետ, որն այն ժամանակ երկրի ղեկավարն էր, և որին մեղադրում էին հատուկ ծառայությունների աշխատակից Լիտվինենկոյին սպանությունը կազմակերպելու մեջ:
Մեծ Բրիտանիայի վարչապետը վերջին 5 տարվա մեջ առաջին անգամ է այցելում Ռուսաստան: Նա այսօր կոչ է արել բրիտանական բիզնեսին աշխատել Ռուսաստանում: Ինչպես հաղորդում է Reuters գործակալությունը, Քեմերոնն այսօր ասել է, թե հույս ունի, որ իր այցելության ժամանակ կստորագրվեն 215 միլիոն ֆունտ ստերլինգի պայմանագրեր, ինչը թույլ կտա ստեղծել 500 նոր աշխատատեղ և պահպանել հազարավորները Մեծ Բրիտանիայում:
Քեմերոնի պատվիրակության մեջ են լինելու մի շարք խոշոր գործարարներ և մեծ ընկերությունների ներկայացուցիչներ, այդ թվում ` British Petroleum և Shell ընկերությունների ղեկավարները:
