COVID-19-ը, ամենայն հավանականությամբ, ունի բնական, այլ ոչ թե լաբորատոր ծագում: Այս մասին Financial Times թերթին տված հարցազրույցում հայտնել է Առողջապահության համաշխարհային կազմակերպության (ԱՀԿ) գլխավոր գիտաշխատող Ջերեմի Ֆարարը։
«Է՛լ ավելի հավանական է դառնում (COVID-19-ի) բնական ծագումը», – նրա խոսքերն է մեջբերում ТАСС գործակալությունը։
Ֆարարը նշել է, որ առաջվա պես դիտարկում է կորոնավիրուսի ծագման այլ վարկածներ, ներառյալ՝ Ուհանի վիրուսաբանության ինստիտուտից կենսանյութի արտահոսը և քաղաքային շուկաներից կենդանական մսի միջոցով վարակի փոխանցումը:
«Չի կարելի անտեսել աշխարհագրությունը, չի կարելի անտեսել (հետազոտական) կենտրոնը»,- հավելել է նա:
Ֆարարը նաև կոչ է արել կազմակերպել «ԱՀԿ-ի նոր առաքելություն Չինաստանում՝ գտնելու կորոնավիրուսի ծագման (պատճառները), եթե (Պեկինի կողմից) պատրաստակամություն լինի կիսվել ողջ տեղեկատվությամբ»։
Covid-ի հետ կապված արտակարգ դրության ռեժիմը համաշխարհային առողջապահությունում գործել է 2020 թ. հունվարի վերջից մինչև 2023 թ. մայիսի 5-ը։ 2020 թ. մարտի 11-ին Առողջապահության համաշխարհային կազմակերպությունը COVID-19-ի բռնկումը որակել է որպես համավարակ։ 2023 թ. հուլիսի 12-ին կազմակերպության կայքում հրապարակված տեղեկատվության համաձայն՝ աշխարհում գրանցվել է կորոնավիրուսով վարակման 767 մլն 972 հազար 961 դեպք, մահացել է 6 մլն 950 հազար 655 մարդ։ ԱՀԿ-ի գլխավոր տնօրեն Թեդրոս Ադհանոմ Գեբրեյեսուսը մայիսի 5-ին Ժնևում կայացած ճեպազրույցում ասել է, որ մահացածների իրական թիվը կազմում է առնվազն 20 միլիոն:
