Ամերիկյան The Wall Street Journal-ի փոխանցմամբ՝ Էրդողանը Եգիպտոս է մեկնելու սեպտեմբերի 12-ին, ուր և ելույթ է ունենալու Կահիրեի համալսարանում։ Նա հանդիպում է ունենալու Եգիպտոսի պաշտպանության նախարար և Գերագույն ռազմական խորհրդի նախագահ Հուսեին Տանտավիի և վարչապետ Իսամ Շարաֆի հետ։
Սակայն բոլորին հետաքրքրում է Էրդողանի՝ Գազայի հատված այցելելու հանգամանքը։ Պաշտոնական Անկարան լուրջ ճնշումներ է գործադրում եգիպտական իշխանությունների վրա՝ Թուրքիայի վարչապետ Էրդողանին եգիպտական տարածքով Գազայի հատված մուտք գործելու հնարավորություն ընձեռելու համար։
Սակայն Եգիպտոսը, ելնելով ազգային անվտանգության նկատառումներից, մերժել է թուրքական կողմի խնդրանքը։ Եգիպտական կողմը դեռևս լիովին չի ապահովել «Ռաֆահ» անցակետի անվտանգությունը։
Հիշեցնենք, որ Էրդողանի մերձավորարևելյան շրջագայությունը նախատեսված է սեպտեմբերի 12-13-ը, որի շրջանակներում նա այցելելու է Եգիպտոս, Լիբիա, Թունիս, հնարավոր է՝ նաև Գազայի հատված։ Դրանից հետո Էրդողանը մեկնելու է Նյու Յորք՝ մասնակցելու ՄԱԿ-ի Գլխավոր ասամբլեայի 66-րդ նստաշրջանին։