Արդեն հայտնի է Հայաստան-սփյուռք համահայկական համաժողովի օրակարգը։ Այս մասին այսօր «Առաջին լրատվականին» հայտնեցին ՀՀ սփյուռքի նախարարության մամլո ծառայությունից՝ մանրամասնելով, որ համաժողովի ընթացքում կլինեն զեկուցումներ՝ Հայաստան-սփյուռք գործակցության պետական քաղաքականության, համակարգի զարգացումների, Լեռնային Ղարաբաղի հիմնահարցի կարգավորման ներկա փուլի մասին և թեմատիկ նիստեր՝ լեզվի և կրթության, երիտասարդների հիմնախնդիրների մասին։ Համաժողովի հանդիսավոր բացումը տեղի է ունենալու ՀՀ նախագահի մասնակցությամբ, ով Ամենայն Հայոց Կաթողիկոս Ն.Ս.Տ.Տ. Գարեգին Բ-ի հետ բացման և ողջույնի խոսքով հանդես կգա: Նախատեսվում է նաև այցելություն Եղեռնի հուշահամալիր և քննարկումներ:
Հիշեցնենք՝ Հայաստան-սփյուռք հերթական համաժողովը տեղի է ունենալու սեպտեմբերի 19-20-ը։ Այդ մասին ՀՀ սփյուռքի նախարար Հրանուշ Հակոբյանը տեղեկացրել էր կառավարական ժամի ընթացքում՝ շարունակելով, որ ֆորումին մասնակցելու է 300 մարդ։ Այս կապակցությամբ նախարարն առաջարկել է Հայաստանի սփյուռքի և արտաքին գործերի նախարարությունների նախաձեռնությամբ ֆորումի հյուրերին ազատել, «ինչպես դա ավանդաբար արվում է», մուտքի արտոնագրի ձևակերպման ծախսերից, ինչին կառավարությունը տվել է իր համաձայնությունը:
Հայաստան-սփյուռք առաջին համաժողովը տեղի է ունեցել 1990-ական թթ., որը եղել է չմշակված և չկանոնակարգված փուլում, թեև նպատակ է ունեցել համախմբել և համակարգել սփյուռքի ուժերը։
Այն հարցին, թե ի՞նչ տեսանելի արդյունք է արձանագրել Սփյուռքի նախարարությունը այս համաժողովների իրականացմամբ, մամլո ծառայությունից պատասխանեցին, որ այս համաժողովները մի քանի տարի առաջ միայն հատուկ մասնագիտացված բնույթ ունեին։ «Մինչ այս կազմակերպել ենք ավելի բարդ համաժողովներ՝ Ճարտարապետների համաժողով, Ֆինանսիստների և բիզնեսմենների համաժողով, որոնց ընթացքում «Աշխարհի քաղաք» նախագիծն է ծնվել և հաջողությամբ իրականացվել։ Այս մասնագիտական համաժողովները ծառայեցին նրան, որ ավելի հմտացանք համաժողովներ կազմակերպելու գործում»,- նշեց մամլո ծառայության պետը՝ հավելելով, որ համաժողովը նպատակ ունի Հայաստանում սփյուռքի գործիչներին ճանաչելի դարձնել և համախմբել։
Համաժողովի վերջին օրը Սփյուռքի նախարարությունը նախատեսել է զորահանդես` նվիրված ՀՀ անկախության 20-ամյակին, հայ ոսկերիչների ցուցահանդեսի բացում և համերգ Հանրապետության հրապարակում: