Ֆուտբոլի Հայաստանի ազգային հավաքականի և «Կրասնոդարի» կիսապաշտպան Էդուարդ Սպերցյանի Եվրոպա տեղափոխության վերաբերյալ իրավիճակը շարունակում է անորոշ մնալ։ Նախորդ մրցաշրջանի սկզբից այս ֆուտբոլիստը գտնվում է եվրոպական մի շարք բարձրակարգ ակումբների ուշադրության կենտրոնում, բայց․․․։ «Սպերցյանի շուրջ իրավիճակը դեռ նույնն է: Որքան գիտեմ, ակումբները, որոնք իսկապես հետաքրքրված են նրանով, պատրաստ չեն վճարել նրա համար պահանջվող գումարը։ Ժամանակի ընթացքում ամեն ինչ կարող է փոխվել»,- Թվիթերի իր էջում գրել է լրագրող Հրաչ Խաչատրյանը։ Ըստ Տրանսֆերմարկետ պարբերականի Սպերցյանի տրանսֆերային արժեքը 12 միլիոն եվրո է։ Հունիսի վերջին տեղեկություն էր տարածվել, որ Սպերցյանը հնարավոր է կարիերան շարունակի Անգլիայի չեմպիոն, Չեմպիոնների լիգայի խաղարկության գործող գավաթակիր «Մանչեսթեր Սիթիում»։ Այս մասին գրել էր Koinc Sport-ը։ Աղբյուրի փոխանցմամբ՝ անգլիական գրանդը Սպերցյանի տրանսֆերի շուրջ բանակցություններ պետք է սկսեր, բայց․․․։ Սպերցյանի ծառայություններով հետաքրքրված են նաև այլ թիմեր։ RB Sport-ի համաձայն 23-ամյա Սպերցյանը կարիերան գերմանական Բունդեսլիգայում շարունակելու երկու տարբերակ ունի։
Ըստ աղբյուրի «Ֆրայբուրգն» ու Մյոնխենգլադբախի «Բորուսիան» պայքարում են Սպերցյանի տրանսֆերի համար։ Նշվում է, որ ակումբների սկաուտները Սպերցյանի խաղին հետևել էլ Հայաստանի հավաքականի վերջին երկու հանդիպումների ընթացքում։ Չմոռանանք, որ վերջերս «Բորուսիայի» հետ պայմանագիր էր կնքել Հայաստանի հավաքականի հարձակվող Հրանտ-Լեոն Ռանոսը։ Տեղկեկություն էր տարածվել նաև, որ Սպերցյանը իտալական «Ինտերի» և «Սասուոլոյի» թիրախում է։ Վերջինիս սպորտային տնօրեն Ջովանի Ռոսսին Спорт-Экспресс-ի թղթակցի հետ զրույցում խոսելով մեր ֆուտբոլիստի հնարավոր տեղափոխության մասին ասել էր․ «Սպերցյանը մեզ համար առաջնահերթ տարբերակ չէ։ Նա թանկ ֆուտբոլիստ է»,- ասել է Ռոսին։ Ավելի վաղ հայտնի էր դարձել, որ Ամստերդամի «Այաքսը» պաշտոնապես դիմել է «Կրասնոդար» ֆուտբոլային ակումբին՝ Սպերցյանի տեղափոխության հարցով։ Հաղորդագրության համաձայն՝ «Այաքսի» ղեկավարը կապ է հաստատել հայ կիսապաշտպանի գործակալների հետ։ Օրեր առաջ Voetbalnieuws-ը գրել էր, որ Սպերցյանին ձեռք բերելու համար «Այաքսը» պետք է վաճառի մի քանի ֆուտբոլիստի։«Այաքսի» եկամուտը նվազել է 45 միլիոն եվրոյով, քանի որ հոլանդական ակումբը չի նվաճել Չեմպիոնների լիգայի հաջորդ խաղարկության ուղեգիր: Ամստերդցիները հաջորդ մրցաշրջանում կխաղան Եվրոպա լիգայում»,- գրել էր վերը նշված պարբերականը։ «Ինձ ոչինչ դեռևս հայտնի չէ: Ես պատրաստվում էի ԲԿՄԱ-ի դեմ խաղին: Կցանկանայի ուժերս փորձել Եվրոպայում. տեսնենք՝ ինչ կստացվի»,- Ռուսաստանի գավաթի եզրափակիչ հանդիպումից հետո ասել էր Սպերցյանը։ Այն, որ Հայաստանի հավաքականի կիսապաշտպանը պետք է հեռանա Ռուսաստանից կարծում ենք պարզ է։
Ամառային տրանսֆերային պատուհանի ընթացքում «Կրասնոդարից» չեռանալու դեպքում Սպերցյանի խաղում հնարավոր է սկիզբ առնի լճացման պրոցեսը։ Սպերցյանի մակարդակի ֆուտբոլիստի Ռուսաստանում մնալը ընդունենք, որ վտանգավոր է։ Խաղամակարդակի կտրուկ անկում տեղի ունեցավ Մոսկվայի «Դինամոյի» հարձակվող Արսեն Զախարյանի մոտ, այն բանից հետո և ձախողվեց նրա տեղափոխությունը Լոնդոնի «Չելսի»։ Շատ էր խոսվում, որ եվրոպական թիմից լավ առաջարկի դեպքում «Կրասնոդարի» ղեկավարությունը և մասնավորապես ակումբի սեփականատեր Սերգեյ Գալիցկին չի խոչընդոտի մեր ֆուտբոլիստի տեղափոխությանը։
Վերջին զարգացումները սակայն ստիպում են ենթադրել, որ այսպես կոչված լավ առաջարկ «Կրասնոդարը» չի ստացել։ Բնական է, որ տրանսֆերի հարցում մեծ նշանակություն ունի նաև ֆինանսական կողմը։ Ավելի ստույգ, ինչպես գրել է Հրաչ Խաչատրյանը եվրոպական թիմերը չեն ցանկանում Սպերցյանի համար վճարել այն գումարը, որը պահանջում է «Կրասնոդարը»։ Իսկ թե որքան է պահանջում ռուսական ակումբը հայտնի չէ։
