Գեղարքունիքի մարզում արդեն մեկնարկել եւ ընթանում են ՀՀ կառավարության կողմից 2023 թվականին իրականացվող սուբվենցիոն ծրագրերը։ Ինչպես «Արմենպրես»-ին տեղեկացրեց Գեղարքունիքի մարզպետի աշխատակազմի քաղաքաշինության, հողաշինության եւ ենթակառուցվածքների կառավարման վարչության պետի պարտականությունները կատարող Գևորգ Խաչատրյանը, 2023 թվականին մարզի համայնքների կողմից մարզպետի աշխատակազմի միջոցով ՀՀ տարածքային կառավարման և ենթակառուցվածքների նախարարություն են ներկայացվել թվով 45 սուբվենցիոն ծրագրերի հայտեր, որոնց ընդհանուր արժեքը կազմել է 13 միլիարդ 145 միլիոն 840 հազար դրամ։ Ներկայացված հայտերից միջգերատեսչական հանձնաժողովի կողմից հաստատվել են թվով 23 ծրագրեր՝ 147 ենթածրագրերով, որոնց նախահաշվային ընդհանուր արժեքը կազմել է 11 միլիարդ 734 միլիոն 789,2 հազար դրամ, որտեղ պետության ներդրման մասնաբաժինը կազմում է ընդհանուր արժեքի 60 տոկոսը, համայնքային մասնաբաժինը՝ 39,2 տոկոսը, այլ ներդրողների մասնաբաժինը՝ 0,8 տոկոսը։
Ծրագրերով նախատեսված է՝ ճանապարհների ասֆալտապատում, ճանապարհների եւ մայթերի սալարկում, խմելու ջրագծերի կառուցում կամ հիմնանորոգում, ոռոգման համակարգերի կառուցում կամ հիմնանորոգում, լուսավորության ցանցի կառուցում կամ ընդլայնում, բազմաբնակարան շենքերի տանիքների հիմնանորոգում, մանկապարտեզի կառուցում, կոյուղագծի եւ դրենաժային համակարգի կառուցում, գույքի ձեռքբերում։
Մարտունի համայնքում կիրականացվի 8 ծրագիր՝ 53 ենթածրագրով, Վարդենիս համայնքում՝ 8 ծրագիր՝ 68 ենթածրագրով, Ճամբարակ համայնքում՝ 5 ծրագիր՝ 14 ենթածրագրով, Գավառ համայնքում՝ 1 ծրագիր՝ 1 ենթածրագրով եւ Սեւան համայնքում՝ 1 ծրագիր՝ 8 ենթածրագրով։
«Ներկայումս հայտարարվել են թվով 22 ծրագրերի մրցույթներ, որի արդյունքում կնքվել են 101 ենթածրագրերի պայմանագրեր։ 2023 թվականին հաստատված սուբվենցիոն ծրագրերի շրջանակներում մեկնարկել են թվով 28 ենթածրագրերի շինարարական աշխատանքները՝ Գավառ, Վարդենիս, Ճամբարակ, Մարտունի համայնքներում։
2023 թվականին միջգերատեսչական հանձնաժողովի կողմից հաստատված թվով 23 ծրագրերի իրականացման արդյունքում նախատեսվում է ասֆալտապատել և սալարկել 39 հազար 600 գծամետր փողոցների երթևեկելի մաս եւ մայթեր, կառուցել թվով 15 բազմաբնակարան բնակելի շենքերի տանիքներ, կառուցել կամ ընդլայնել 55 հազար 540 գծամետր լուսավորության ցանց, 39 հազար 230 գծամետր ոռոգման համակարգ, 82 հազար 300 գծամետր խմելու ջրագիծ, մեկ մանկապարտեզի շենք, մեկ կոյուղագիծ և դրենաժային համակարգ, մեկ հուշահամալիր։
2021-2022 թվականներից 2023 թվական են տեղափոխվել թվով 62 ենթածրագրեր։ Այս մասով շինարարական աշխատանքները մեկնարկել են գարնանը։ 2023 թվականի հուլիսի դրությամբ ավարտվել են 21 ծրագրեր, ևս 14 ծրագրեր գտնվում են ավարտական փուլում։ Մնացած ծրագրերի մասով շինարարական աշխատանքներն ընթացքի մեջ են»,-ներկայացրեց Գեւորգ Խաչատրյանը։
