«Հանրապետություն» կուսակցության նախագահ Արամ Սարգսյանը իր խոսքը սկսեց մեծն դիրիժոր Օհան Դուրյանի ծննդյան շնորհավորանքով:
«Ժողովուրդ ջան, պատկերացրեք քաղաքում սփռված տարբեր պաստառները, թե՝ ես քեզ սիրում եմ: Եթե այդ պաստառներից որևէ մեկի վրա լիներ Օհան Դուրյանի լուսապայծառ պատկերը, ձեզանից որևէ մեկը չէր կասկածի, որ այդ սերն անկեղծ է: Ինչո՞ւ, որովհետև այդ մարդը դրախտում հայտնվելով՝ դրախտը ավելի երանելի դարձրեց: Իր գոյությամբ ապացուցեց, որ ոչ միայն տաղանդավոր դիրիժոր է, այլև՝ մեծ հայ:
Արամ Սարգսյանը խոսեց այս իշխանության՝ վերջին շրջանում տարածվող լոզունգ-գաղափարի մասին: Խոսում են հերոսներից, իրենց վրա մեղք վերցնում, որ հերոսի կերպար չեն ստեղծել: Խորհուրդ տալով նմանվել ոչ թե սրանց, այլ շախմատիստներին: Ում չնմանվեն՝ որ ջիպ, հարստություն ունեն, բայց խելք չունեն: Եթե ասում ես՝ նա էլ ասա: Հերոսի կերպար չեն կերտում: Իրական հերոսի անունները տվեք: Հերոս ծնվում են, հերոս չեն դառնում»,- նշեց Արամ Սարգսյանը:
Նա ևս մեկ խնդրի անդրադարձավ, թե՝ Հայաստանը Դու ես: «Հայաստանը, նախ ասեմ, դու չես, Հայաստանը մենք ենք: Երկրորդ՝ անկեղծությամբ ասենք, որ Հայաստանը մենք ենք՝ այստեղ հավաքվածները: Արդյոք Հայաստանը Դու ե՞ս, իշխանավորներ: Հայաստանը նա է, որ ճամպրուկ է լցնում, հոր շիրիմին խունկ ծխի ու գնա Հայաստանից: Հայաստանը փոփոխություն է ուզում, դրա համար ենք ձեզ հետ խոսում: Այ սա է, որ ցանկանում ենք՝ հասկանաք: Մեր ու ձեր պատկերացրած Հայաստանները տարբեր են, պարոնայք իշխանավորներ: Ի՞նչ է պետք ոտքի հանելու համար՝ մեկ բան. Օհան Դուրյանի նման սիրել այս հայրենիքը: Արցախում զոհված տղաների նման սիրել այս հայրենիքը, մարտի 1-ին զոհված տղաների նման սիրել այս հայրենիքը, ու Հայաստանը ոտքի կկանգնի:
Պարոնայք իշխանավորներ, ես ցանկանում եմ, որ հանուն ձեր կանանց, երեխաների, ծնողների, եկեղեցիներում մկրտվածների, շիրիմների, որ ունենք, սիրեք այս հայրենիքը: Հասկացեք սա և հետդարձի եկեք:
Ժողովուրդ ջան, մի քանի օրից Հայաստանը տոնելու է իր անկախության 20-ամյակը: Ես, այս ամբիոնը օգտագործելով, շնորհավորում եմ, և ամբողջ ուժով ժողովուրդը ոտքի է կանգնելու և ասելու, որ Հայաստանը մենք ենք, մենք բոլորով: