Պաշտպանության նախկին նախարար, ներկայումս կալանավորված Դավիթ Տոնոյանը հայտարարություն է տարածել այն մասին, որ 44-օրյա պատերազմի հանգամանքների քննիչ հանձնաժողովում Նիկոլ Փաշինյանի ելույթի ընթացքում արտահայտած մի շարք մտքեր, ինչպես նաև դրանց՝ ԶՈՒ ԳՇ նախկին պետ Օնիկ Գասպարյանի արձագանքը դարձել են պատճառ, որ ինքը փոխի հանձնաժողովի աշխատանքի հանդեպ իր վերաբերմունքը և ցանկություն հայտնի մասնակցել այդ աշխատանքին և պատասխանել հարցերին: «2022 թվականի հունիսի 15-ին հայտարարության մեջ ներկայացրել եմ կասկածներս ԱԺ «Քննիչ հանձնաժողովի» իրական նպատակների մասին: Դրանք հաստատվեցին վերջին շրջանում, երբ հանձնաժողովի նախագահը փաստացի մերժեց հրապարակային առաջարկս՝ բաց նիստ անցկացնել Նիկոլ Փաշինյանի և իմ մասնակցությամբ:
«Քննիչ հանձնաժողովի» նպատակների և աշխատաոճի հանդեպ ունեցածս բոլոր վերապահումներով հանդերձ որոշել եմ ներկայանալ այդ մարմին՝ բացատրություններ տալու և հարցերին պատասխանելու նպատակով: Նման որոշման հիմք են հանդիսացել հանձնաժողովում Նիկոլ Փաշինյանի ելույթը և դրան հաջորդած ՀՀ Զինված ուժերի Գլխավոր շտաբի նախկին պետ Օնիկ Գասպարյանի հայտարարությունները, ինչպես նաև հանրային պահանջը», ասված է Տոնոյանի հայտարարության մեջ: Նա միջնորդություն է ներկայացրել, որպեսզի իրեն թույլատրվի կալանավայրից տեղափոխվել հանձնաժողովի աշխատանքի վայր և մասնակցել դրան:
Տրամաբանությունը հուշում է, որ Դավիթ Տոնոյանի միջնորդությունը պետք է բավարարվի, այլապես դա կդիտվի ակնառու խտրականություն և անաչառության խախտում: Վերջին հաշվով հազիվ թե լինի զուտ հանձնաժողովի նիստին մասնակցելու նպատակով կալանավայրից ԱԺ տեղափոխվելու և հետո՝ վերադառնալու հնարավորությունը մերժելու ողջախոհ փաստարկ, եթե հաշվի առնենք այն, որ այդ գործընթացը բնականաբար իրականացվելու է իրավապահների հսկողությամբ: Համենայն դեպս, նախկին նախարար Տոնոյանի մասնակցության հնարավորությունը զուտ հետաքննական շահի տեսանկյունից կիմաստավոր վարչապետ Փաշինյանի ելույթը, որը ինքնին գրեթե ամբողջությամբ քաղաքական էր: Իհարկե, Դավիթ Տոնոյանի դիրքորոշման փոփոխությունը առաջացնում է հարցեր, թե հատկապես ի՞նչն է, որ վարչապետի ելույթից և Օնիկ Գասպարյանի պատասխանից հետո փոխել է նրա մտադրությունն ու առաջացրել հարցերի պատասխանելու ցանկություն: Արդյո՞ք նա այդտեղ նշմարել է ռիսկ, որ պատերազմի հանգամանքների հարցում իր վրա կարող է մնալ պատասխանատվության որոշակի բեռ: Բոլոր դեպքերում, անկասկած է, որ զուտ հանձնաժողովի գործի և հանրության իրազեկվածության շահերից է բխում, որ Տոնոյանի միջնորդությունը բավարարվի և ապահովվի նրա արտահայտվելու հնարավորությունը:
