Հունիսի 16-ին և 17-ին բասկետբոլի Հայաստանի ու Ֆրանսիայի հավաքականներն ընկերական խաղեր կանցկացնեն ԱՄՆ-ի Լոս Անջելես քաղաքում։ Ֆրանսիան Եվրոպայի գործող փոխչեմպիոնն է, իսկ Հայաստանը՝ ՖԻԲԱ Եվրոպայի փոքր երկրների առաջնության հաղթող։
Այս օրերին մարզասերներին թերևս մեկ հարց է հուզում՝ արդյո՞ք այս հանդիպումները կանցեն լեցուն տրիբունաների ներքո, հայ երկրպագուների բուռն աջակցությամբ։ Շատ է խոսվում, որ Լոս Անջելեսում բնակվում են հարյուր հազարավոր հայեր, բավական ուժեղ է նաև հայկական լոբբին։ Ֆրանսիայի դեմ հանդիպումները իրական հնարավորութուն է հասկանալու, թե որքանով է այս ամենն իրականություն։ Այլ կերպ ասած մեր ազգային թիմի հանդիպումները նոր փորձություն է սփյուռքի համար։
Այո, հանդիպումներն ընկերական են, բայց խոսքը գնում է մեր երկրի ազգային թիմի մասին։ Ուստի կարևոր է, որ խաղալով ԱՄՆ-ում մեր հավաքականն ունենա լայն աջակցություն։ Նշենք նաև, որ հանդիպումները կայանալու են ընդամենը 2300 հանդիսական տեղավորղ մարզադահլիճում։ ԱՄՆ-ում բնակվող մեր հայրենակիցները խաղի տոմսերը կարող են ձեռք բերել Armeniabasketball.com կայքում։
