Կանանց ներգրավվածությունը զինված ուժերում, ընդհանրապես կանանց դերի մեծացման ուղղված բոլոր քայլերին միշտ կողմ եմ եղել: Այս մասին «Առաջին լրատվական»-ի հետ զրույցում նշեց ԱԺ Պաշտպանության և անվտանգության հարցերի մշտական հանձնաժողովի փորձագետ Արծրուն Հովհաննիսյանը՝ անդրադառնալով բանակում իգական սեռի քաղաքացիների կամավոր հիմունքներով պարտադիր զինվորական ծառայության համակարգի ներդրմանը:
«Տարիներ առաջ ռազմաուսումնական հաստատություններ ընդունվող կանան համար նախագծին ինքս մասնակցել եմ, համարում եմ, որ դա առաջընթաց է: Ամբողջ աշխարհում նորմալ հնարավորություններ են ստեղծված տղամարդկանց և կանանց համար հավասար ծառայություն անցկացնելու: Մյուս կողմից կանանց զինծառայության բերելը չի կարող լինել տղամարդկանց նման պարտադիր2 տարով: Հետևաբար, այս քայլը շատ խելամիտ է: Մի կողմից այն կամավոր է, որովհետև ներգրավումը կամավոր պետք է լինի, մյուս կողմից, երբ ինքը դառնա ժամկետային պարտադիր զինծառայող, ունենա որոշակի սահմանափակ ժամկետ: Իհարկե, այդ սահմանափակումները պետք է վերաբերեն նաև ծառայության բնույթին: Կանայք դեռ չեն կարող որպես ժամկետային զինծառայողներ, տղամարդկանց հետ լինել բոլոր մարտական իրավիճակներում»,-ասաց նա: