Ադրբեջանի կողմից 2 հայ զինծառայողների` Հարություն Յուրիկի Հովագիմյանի և Կարեն Աշոտի Ղազարյանի ապօրինի առևանգման դեպքով Միջազգային իրավական հարցերով ՀՀ ներկայացուցչի գրասենյակը դիմել է ՄԻԵԴ միջանկյալ միջոց կիրառելու պահանջով՝ զինծառայողների կյանքի իրավունքը ապահովելու նպատակով։ Ադրբեջանը պետք է դատարանին ներկայացնի նրանց պահման պայմանները, բժշկական և այլ փաստաթղթեր։
Այս առնչությամբ, ՄԻԵԴ-ում հայ ռազմագերիների ներկայացուցիչ Սիրանուշ Սահակյանը «Առաջին լրատվական»-ի հետ զրույցում նշեց. «Սրանք անհապաղ կարգով քննարկման ենթակա միջնորդություններ, որը կարող է տևել 24 ժամից մինչև 7 օր: Եթե հավելյալ տեղեկատվություն անհրաժեշտ լինի, ապա ՄԻԵԴ-ը անհապաղ գործը կկոմունիկացնի Ադրբեջանի կառավարությանը և կպահանջի տեղեկատվությու զինծառայողների գտնվելու վայրի, պահպան պայմանների, առողջական վիճակի և այլ հանգամանքների առնչությամբ: տեղեկատվությունը լրացվելուց հետո կկայացվի որոշում: Քանի որ մենք նաև նախադեպ ունենք, որ ՄԻԵԴ-ը մերժել է ադրբեջանական կողմի միջնորդությունը՝ հենվելով Հայաստանի կառավարության դիրքորոշման վրա, նույնական ընթացակարգեր կկիրառվեն և նախ առաջնահերթորեն տեղեկատվություն կհայցվի ադրբեջանական կողմից երկու զինծառայողների վերաբերյալ, և դրա հիման վրա ՄԻԵԴ-ը որոշում կկայացնի: Բայց կարծում եմ՝ երեք օրվա կտրվածքով որոշում կկայացվի»:
Հարցին, թե որքանով է հավանական, որ ՄԻԵԴ-ը մեզ ձեռնտու որոշում կկայացնի, Սիրանուշ Սահակյանը պատասխանեց. «Շանսերը բարձր եմ գնահատում: Հարյուրավոր հայ զինծառայողների առնչությամբ՝ գերեվարված, առևանգված, ապօրինի պահվող և այնտեղ պատիժը կրող, ՄԻԵԴ-ը կիրառել է անհապաղ միջոցներ: Հայերի հանդեպ ատելության և ցեղասպանական քաղաքականության գոյության պայմաններում այդ ռիսկերը չափազանց մեծ են և դատարանը վտանգները հաշվի առնելով լրացուցիչ ապահովող միջոցներ է ձեռնարկում»:
Անդրադառնալով նրան, որ օրերս Ադրբեջանի ԱԳ նախարարը հայտարարել էր, որ Հայաստանում գտնվող երկու ադրբեջանցիներին վերադարձնելու հարցով դիմելու են ՄԻԵԴ ու ՄԱԿ, նրանց հայցը որևէ կերպ կարո՞ղ է բավարարվել, երբ նրանցից մեկը մեղադրվում է սպանության մեջ, Սահակյանն ասաց. «Կարծում եմ՝ ոչ, պարզապես մինչև փաստերի ստուգումը ժամանակ կանցնի և նրանք այդ ժամանակային գործոնն են օգտագործում, մինչև դատարանի կողմից իրենց վկայակոչված վարկածների հերքում մոլորեցնում են և միջազգային հանրության էմոցիաների հետ են խաղում: Փորձում են այդ միջադեպերով նաև մեղմել միջազգային արձագանքը հայերի նկատմամբ կատարվող սիստեմատիկ կոտորածների ու վայրագությունների հանդեպ: Կարճաժամկետ հեռանկարով են նրանք դիտարկում և հանրային տրամադրությունների վրա են փորձում ազդել:
Բայց մենք ունենք բազմաթիվ դեպքեր, երբ ադրբեջանական վարկածները հիմնավոր կերպով դատարանում հերքվել են: Օրինակ, նրանք առաջ են քաշել ինքնասպանության վարկածը, բայց դատարանը հաստատված է համարել սպանության վարկածը: Սա ադրբեջանական ձեռագրի շրջանակներում է և չափազանց կանխատեսելի է այն փաստաբանների համար, որոնք առնչվել են ադրբեջանական գործերին»:
Հիշեցնենք` մարտի 26–ին մարտական դիրքեր սնունդ մատակարարող ՀՀ ԶՈւ 2 զինծառայողի հետ կապն ընդհատվել էր։ Մայիսի 27-ին միջդիրքային ճանապարհին հայտնաբերվել է թիկունքային մատակարարման ավտոմեքենան, որի մեջ եղել է նաև զինվորներից մեկին ամրակցված զենքը։ Նույն օրը հայտնի դարձավ նրանց առևանգել են ադրբեջանցիները։ ՊՆ–ն հրապարակել է նաև զինծառայողների անունները` Հարություն Յուրիկի Հովագիմյան և Կարեն Աշոտի Ղազարյան:
