«Առաջին լրատվական»-ի զրուցակիցն է Արցախի Հեղափոխական կուսակցության նախագահ Արթուր Օսիպյանը։
-Պարոն Օսիպյան, ԱՀ նախագահ Արայիկ Հարությունյանը ստորագրել է հրամանագրեր ռազմական դրության պայմաններում կիրառվող լրացուցիչ սահմանափակումների մասին, ըստ որի՝ արգելվում են բոլոր տեսակի հավաքները, բացառությամբ՝ Արցախի ժողովրդի ինքնորոշման իրավունքի իրացման նպատակով, ինչպես նաև տոների և հիշատակի օրերին կազմակերպվող հավաքները։ Կան որոշակի սահմանափակումներ նաև տեղեկատվական դաշտի համար։ Ի՞նչ դիտարկումներ ունեք այս որոշման մասին։
–Կարևոր է հասկանալ, թե ինչ նկատի ունի Արայիկ Հարությունյանը։ Իրականում համացանցում լինում են այնպիսի հրապարակումներ, որոնք անհիմն խուճապ են մտցնում և հետևաբար անվտանգության սպառնալիք են հանդիսանում։ Մանրամասներին առայժմ ծանոթ չեմ, բայց որքանով ես եմ հասկանում՝ որոշումը տրամաբանական է։ Կարևոր է, որ ամեն ինչ չափի մեջ լինի, այսինքն՝ թույլատրեն անցկացնել այն հավաքները, որոնք վտանգ չեն ներկայացնում։ Սակայն մենք շատ լավ տեսնում ենք, որ մարդիկ են դուրս գալիս փողոց, որոնք նույնիսկ նպատակ չունենալով այնպիսի արտահայտություններ են անում բանակի մասին, որ ընդհանրապես տեղին չէ։ Չեմ ուզում կրկնել այդ հայտարարությունները, բայց նման բաներ եղել են ու ցանկալի չէ, որ ապագայում էլ լինեն։
-Հնարավո՞ր է այս որոշումը պայմանավորված է Սամվել Բաբայանի ու Ռուբեն Վարդանյանի ակտիվությամբ։
-Դժվար։ Ե՛վ Ռուբեն Վարդանյանին և՛ Սամվել Բաբայանին հնարավորություն են տվել ինչ ուզեն անեն։ Երկուսն էլ իրենց հավաքներն արել են, ո՞վ է իրենց խանգարել։
-Այսինքն՝ կոնկրետ մարդկանց դեմ ուղղված չէ։
-Ո՛չ, չեմ կարծում, թե այս պահին Սամվել Բաբայանի կամ Ռուբեն Վարդանյանի մեջ վտանգ են տեսնում, որ նրանք կարող են իշխանության համար խնդիրներ ստեղծել։ Ընդհակառակը՝թույլ են տվել, որ ամեն մեկն իր ասելիքն ասի, դրանից հետո նոր որոշ սահմանափակումներ են մտցնում։
-Արցախի քաղաքական վիճակն ինչպե՞ս կգնահատեք, տարաձայնությունները հարթվե՞լ են։
-Ընդհանուր ալիքը թուլանում է, որովհետև հասարակությունն էլ ասում է՝լավ իրար ուտում եք, բայց ոչ մեկդ էլ ոչ մի ռեալ բան չեք առաջարկում։ Իրենց այդ հռետորաբանությունը՝ համախմբվենք և այլն, բոլորին է պարզ։ Հետո ի՞նչ է լինելու, ասելու բան չունեն, ուրեմն հանգելու են։
-Իշխանություններին այս պահին վտանգ չի՞ սպառնում։
-Ո՛չ, Արայիկ Հարությունյանը թույլ է տվել՝ ով ինչ ուզի անի, հիմա արդեն կհանգստանան։ Ես ընդհանրապես դեմ եմ հավաքներն արգելելուն, բայց այս վիճակում, այո՛ պետք է ուշադրություն դարձնել հավաքի իմաստի վրա, հայտարարությունների կոռեկտությանը, ավելի, քան երբևէ։ Իսկ ընդհանրապես չեմ կարծում, թե կոպիտ սահմանափակում է լինելու, որ ոչ մեկ ոչ մի բան չխոսա։
-Կարծում եք այդ հայտարարությունները նաև Երևանի՞ն են վնասում բանակցային պրոցեսում։
-Իհարկե, բայց առաջին հերթին վնասում են հենց Արցախին։ Իմիջայլոց ոչ այնքան հավաքները, որքան Ազգային ժողովը, կառավարության ու նախագահի աշխատակազմի ներկայցուցիչներն են այդ վնասը հասցնում։ Հավաքներն ավելի շատ ներքին անկայունության ու պառակտման պատճառ են դառնում, իսկ ինչ վերաբերում է բանակցային գործընթացներին, դա ես հավաքների հետ չեմ կապում։Խնդիրն ավելի շատ Ազգային ժողովի, կառավարության առանձին ներկա ու նախկին պաշտոնյաներն են։ Խոսքս վերաբերվում է նաև Բակո Սահակյանին ու Արկադի Ղուկասյանին։