Ուկրաինացի օդաչուները անհամբերությամբ սպասում են F-16 կործանիչների օգտագործման ուսուցման մեկնարկին՝ մարտի դաշտում իրենց հայրենակիցներին աջակցելու համար,- «Twitter»-ում գրել է Ուկրաինայի պաշտպանության նախարար Ալեքսեյ Ռեզնիկովը։
Ռեզնիկովը «Twitter»-ում իր հայտարարությանը կցել է Նոր տարվան հրապարակված նոր տեսանյութ, որտեղ նա նամակ է գրում Ձմեռ պապին և ի թիվս այլ սարքավորումների խնդրում կործանիչներ:
«Կարծում եմ՝ Ձմեռ պապը գոյություն ունի։ Այսօր ծնվել է ինքնաթիռների նոր կոալիցիա։ Ուկրաինացի օդաչուներն անհամբեր սպասում են F-16 կործանիչների պատրաստման մեկնարկին։ Այժմ նրանք կկարողանան աջակցել իրենց եղբայրներին և քույրերին ցամաքում և ծովում, որպեսզի հաղթեն այս պատերազմում»,- գրել է Ռեզնիկովը։
Հիշեցնենք, որ Սպիտակ տունը ավելի վաղ հաստատել էր, որ Վաշինգտոնը կմիանա «մարտական ինքնաթիռների կոալիցիային», որը ուկրաինացի օդաչուներին կպատրաստի չորրորդ սերնդի կործանիչների, այդ թվում՝ F-16-ների օգտագործմանը: Բացի այդ, Սպիտակ տունը հայտարարել է, որ առաջիկա ամիսներին ԱՄՆ-ը և նրա դաշնակիցները կքննարկեն, թե երբ և որքան կործանիչ կստանա Ուկրաինան։
