Ադրբեջանցի ֆուտբոլիստներն աննախադեպ խոշոր պարգևավճար են ստացել՝ իրենց վերջին ելույթների համար

Ռուսական Regnum լրատվական գործակալության փոխանցմամբ՝ Ադրբեջանի ֆուտբոլային ընտրանին խոշոր պարգևավճար է ստացել՝ «Եվրո-2012»-ի ընտրական մրցաշարի «Ա» խմբում անցկացրած իր վերջին երկու հաջող հանդիպումների համար։

Նշվում է, որ հանդիպումից անմիջապես հետո հանդերձարան է մտել Ադրբեջանի ֆուտբոլի ֆեդերացիայի (AFFA) նախագահ Ռովնագ Աբդուլաևը (ով միաժամանակ հանդիսանում է Ադրբեջանի Հանրապետության պետական նավթային ընկերության (SOCAR) նախագահը – 1in.am) և հաղթանակի կապակցությամբ շնորհավորել ֆուտբոլիստներին։

Աբդուլաևը հայտարարել է, որ յուրաքանչյուր ֆուտբոլիստ Ղազախստանին հաղթելու (3։2) և Բելգիայի հետ ոչ ոքի (1։1) խաղալու համար ստանալու է 50,000 մանաթ (60,000 դոլար)։

Հիշեցնենք, որ մինչ այս ադրբեջանցի ֆուտբոլիստների ամենաբարձր դրամական պարգևատրության դեպքը գրանցվել էր նախորդ տարի, երբ Ադրբեջանի ֆուտբոլային ընտրանին 1։1 հաշվով ոչ ոքի էր ավարտել Ռուսաստանի հետ հանդիպումը, ապա 2։0 հաշվով հաղթել էր Լիխտենշտեյնի ընտրանուն։ Այդ ժամանակ ադրբեջանցի ֆուտբոլիստները պարգևատրվել էին 40,000-ական մանաթով (50,000 դոլար)։