Սևծովյան տնտեսական համագործակցության խորհրդարանական վեհաժողովի շրջանակներում Անկարայում գտնվող ԱԺ նախագահ Ալեն Սիմոնյանը հանդիպել է լրագրողների հետ։
Նա հայտարարել է, որ հիմա ծանր ժամանակահատված է, աշխարհում լարված իրադարձություններ և կոնֆլիկտներ են տեղի ունենում, և իր՝ այստեղ գալը նաև նպատակ ուներ ի ցույց դնել Հայաստանի կամքը՝ բարիդրացիական հարաբերություններ հաստատելու իր հարևանների հետ. «Կարծում եմ՝ մենք այս պատմական հնարավորությունը չպետք է բաց թողնենք»։
Ալեն Սիմոնյանն անդրադարձել է Երևանում «Նեմեսիս»-ի հուշարձանի տեղադրմանն ու Թուրքիայի արձագանքներին։ Նա ասել է, թե ցավում է, որ հուշարձանի տեղադրումը նման արձագանք է ստացել Թուրքիայում․ «Ես այս հարցը քննարկել եմ նաև իմ թուրք գործընկերոջ հետ։ Որոշումը կայացվել է ՏԻՄ-ում, և ես չեմ ցանկանում, որ հուշարձանի տեղադրումն այստեղ ընկալվի որպես Հայաստանի պետական արտաքին քաղաքականության դրսևորում կամ որպես ոչ բարիդրացիական քայլ։ Հայաստանում պետական արտաքին քաղաքականությունն իրականացվում է վարչապետի և ԱԳ նախարարի կողմից, իսկ այդ մակարդակում կայացված որոշումներին բոլորն ականատես են վերջին ամիսների ընթացքում։ Մենք պետք է հասկանանք, որ ցանկության դեպքում միշտ կարելի է առիթներ, պատճառներ գտնել հարաբերությունները վատացնելու»,- ասել է Ալեն Սիմոնյանը։
