Վրաստանը զգալի առաջընթաց է գրանցել բազմաթիվ առանցքային բարեփոխումների հարցում: Այս մասին ասվում է Լյուքսեմբուրգում նախարարական հանդիպումից հետո Եվրոպական Միության խորհրդի կայքում հրապարակված հաղորդագրությունում:
Խորհրդի տեղեկատվության համաձայն՝ ԵՄ-ի երկրների արտգործնախարարները ճաշի սեղանի շուրջ ոչ պաշտոնական զրույց են ունեցել Վրաստանի արտաքին քաղաքական գերատեսչության ղեկավար Իլյա Դարչիաշվիլիի հետ՝ «հատուկ ուշադրություն հատկացնելով Վրաստանի եվրոպական հեռանկարին և նրա ժողովրդավարության ամրապնդման անհրաժեշտությանը»։
«Քննարկումը հաստատեց, որ Վրաստանը զգալի առաջընթաց է գրանցել բազմաթիվ առանցքային բարեփոխումների հարցում և ընդգծեց, որ օրենքի գերակայությունը, մարդու իրավունքները, լրատվամիջոցները, քաղաքացիական հասարակությունը և անկախ պետական ինստիտուտները կարևոր տարրեր են ԵՄ-ին միանալու ձգտող յուրաքանչյուր երկրի համար», – նշվում է հաղորդագրության մեջ:
Եվրամիության խորհուրդը 2022 թ.-ի հունիսին ճանաչել է Վրաստանի եվրոպական հեռանկարը և պատրաստակամություն հայտնել այդ երկրին ԵՄ-ին անդամակցության թեկնածու երկրի կարգավիճակ տրամադրել, հենց կատարվեն 12 պայմանները։ Այդ պայմանների թվում են բևեռացման վերացումը, ապաօլիգարխացումը, մեդիամիջավայրի բարելավումը, դատական համակարգի լիակատար անկախության ապահովումը և այլն։ Նույն օրը որոշում է ընդունվել Ուկրաինային և Մոլդովային թեկնածու երկրի կարգավիճակ տրամադրելու վերաբերյալ։
Աշնանը կհրապարակվի Եվրահանձնաժողովի գնահատման հաշվետվությունը, որի հիման վրա 2023 թ.-ի վերջին Եվրոպական Միության խորհուրդը կքննարկի Վրաստանին թեկնածու երկրի կարգավիճակ տրամադրելու հարցը։ Վրաստանը Եվրահանձնաժողովի միջանկյալ գնահատականին սպասում է ամռանը, իսկ թեկնածուի կարգավիճակ տալու վերաբերյալ վերջնական որոշմանը՝ տարվա վերջին։
Sputnik գործակալության վրացական ծառայությունը հիշեցնում է, որ ավելի վաղ Վրաստանին թեկնածուի կարգավիճակ տրամադրելուց ԵՄ-ի հրաժարվելը Թբիլիսիում որակել էին որպես քաղաքական որոշում՝ հայտարարելով, որ Վրաստանը կատարել է ԵՄ-ի հետ Ասոցացման համաձայնագրի պահանջների մեծ մասը և ավելի մեծ առաջընթաց է գրանցել, քան Ուկրաինան և Մոլդովան։
