Ղազախստանը ծրագրում է ավելացնել նավթի մատակարարումն Ադրբեջանի տարածքով։ Ինչպես հայտարարել է Ղազախստանի նախագահ Կասիմ-Ժոմարտ Տոկաևը, Ադրբեջանի նախագահ Իլհամ Ալիևի հետ հանդիպումից հետո բանակցությունների ընթացքում կողմերը հատուկ ուշադրություն են դարձրել էներգետիկայի ոլորտում համագործակցությանը։
Ղազախստանի մայրաքաղաքում կայացած հանդիպման ընթացքում նախագահները քննարկել են առևտրատնտեսական, տրանսպորտային-լոգիստիկ և էներգետիկ ոլորտներում համագործակցության հարցեր։
Ըստ Տոկաևի՝ առաջնահերթ խնդիր է համաշխարհային շուկաներում էներգառեսուրսների մատակարարման դիվերսիֆիկացումը։
«Մեր պայմանավորվածությունների օգնությամբ այս տարի ղազախական նավթի առաջին խմբաքանակն ուղարկվել է Ադրբեջանի տարածքով։ Հաջորդ քայլը մատակարարման ծավալների մեծացումն ու երկարաժամկետ, կայուն բնույթ տալն է։ Օգտվելով առիթից՝ շնորհակալություն կհայտնեմ Ադրբեջանի առաջնորդին այս կարևոր նախաձեռնություններին ցուցաբերած անձնական աջակցության համար»,- ասել է Կասիմ-Ժոմարտ Տոկաևը։
Իր հերթին, Ադրբեջանի ղեկավարը նշել է, որ ղազախ գործընկերոջ հետ քննարկել է Միջին միջանցքով բեռնափոխադրումների ավելացման ժամանակացույցը։
«Մեր երկրների միջև դաշնակցային հարաբերությունները ամուր հիմք են մեր համագործակցության հետագա զարգացման համար։ Այսօր մենք այն լրացնում ենք կոնկրետ բովանդակությամբ, և այն որոշումները, որոնք կայացվել են Բաքվում օգոստոսին, արդեն իրականացվում են։ Ինչպես նշել է նախագահ Տոկաևը, դրանց թվում են ղազախական նավթի տարանցման մեկնարկը Ադրբեջանի տարածքով, մեր երկրների տրանսպորտային և լոգիստիկ ենթակառուցվածքների ինտեգրման լուրջ աշխատանքի սկիզբը՝ Միջին միջանցքի հնարավորությունների լիարժեք իրականացման համար։ Այսօր մենք քննարկել ենք Արևելք-Արևմուտք երթուղու բեռնափոխադրումների ավելացման կոնկրետ թվեր և կոնկրետ ժամանակացույց, և համապատասխան կառույցների ղեկավարներին հանձնարարել ենք մոտ ապագայում աշխատել այդ բոլոր հարցերի շուրջ»,- ասել է Ալիևը։