«Fitch-ի գնահատականը, ըստ էության, Հայաստանի համար միջակ է: Երբ փակագծերը բացում ենք, անհանգստությունները ավելի մեծ են, քան կայուն զարգացման մասին սպասումները»,- այս մասին «Առաջին լրատվականի» հետ զրույցում նշեց ԿԲ նախկին նախագահ Բագրատ Ասատրյանը:
Գնահատականը տրվել է ինչ-որ ցուցանիշների ամբողջականության հիման վրա, այն էլ ծրագրային ցուցանիշների, այն ծրագրերի, որոնք այսօր հրապարակված են, և որոնցով Հայաստանը պետք է առաջ գնա: «Այդ ծրագրերը իրականություն կդառնան, թե ոչ կամ ինչ հետևանքներ կունենան՝ դա այս գնահատականը չէր կարող հաշվի առնել: Գալով իրողությանը` մենք գործ ունենք բավական բարդ խնդիրների հետ, որոնց լուծման եղանակները դեռ նախանշված չեն, Հայաստանը չի վերապրել ճգնաժամը: Հայաստանը դեռ գտնվում է ճգնաժամի մեջ, մենք կարող ենք համարվել ճգնաժամից դուրս եկած, երբ վերականգնված լինի նախաճգնաժամային վիճակը»,- շարունակեց Բագրատ Ասատրյանը:
Ավելին՝ կան խնդիրներ, որոնք այսօր էլ բացասական զարգացումներ են ապրում. դրանք հիմնականում սոցիալական դաշտին վերաբերող խնդիրներ են: Բ. Ասատրյանի խոսքով, գործ ունենք բավական բարձր գնաճի հետ, որն առավելապես խփում է սոցիալապես թույլ պաշտպանված խմբերին: Գործ ունենք արտագաղթի հետ, այսինքն` երկրի քաղաքացիները չեն կարողանում իրենց ապագան տեսնել մեր երկրում: Սրանք իրական գնահատականներն են մեր տնտեսության, սոցիալ-տնտեսական վիճակի վերաբերյալ:
Այն հարցին, թե ինչքանո՞վ է կարևորվում Fitch-ի գնահատականը ՀՀ համար, ԿԲ նախկին նախագահը պատասխանեց.
«Ընդհանրապես միջազգային այսպիսի կազմակերպությունների գնահատականները ՀՀ համար մեծ դեր և կարևորություն չունեն: Հայաստանը մի երկիր է, որը շատ կառույցների ուշադրությունից հեռու է: Ցավոք, տնտեսական աշխարհում Հայաստանը ավելի նեգատիվ բնութագրերով է առանձնանում: Բայց BB- գնահատականը վատ չէ, պարզապես բիզնեսը ղեկավարվում է այլ կանոններով: Իրական խնդիրները, որոնք պետք է լուծվեն, դրանց լուծման եղանակները, ձևերը նախանշված չեն: Մեր այսօրվա համակարգը, ամբողջությամբ վերցրած, նույն անարդյունավետ համակարգն է, 3-4 հոգի թելադրող դիրքերը գրավել են, կառավարությունը խոշոր օլիգարխների խղճուկ սպասարկողի դերում է այսօր»:
Հիշեցնենք, որ Fitch միջազգային վարկանիշային գործակալությունը Հայաստանի էմիտենտի դեֆոլտի երկարաժամկետ վարկանիշը հաստատել է BB- մակարդակում՝ «կայուն» կանխատեսմամբ:
