ԱՄՆ պաշտպանության նախարարության կայքում նախ հրապարակվել էր տեղեկություն, ըստ որի` առաջիկայում կայանալիք «Defender 2023» բազմազգ զորավարժության մասնակիցների շարքում էր նաև Հայաստանը։ Ավելի ուշ սակայն, ԱՄՆ պաշտպանական գերատեսչության հաղորդագրությունից դուրս եկավ Հայաստանը։ Այդ առնչությամբ լրատվամիջոցների հարցին Հայաստանի ՊՆ խոսնակը արձագանքել է, որ Երևանը ծրագրում է մասնակցել ԱՄՆ եվրոպական հրամանատարության կազմակերպելիք երկու այլ վարժանքների` 2 այլ զորավարժությունների՝ KFOR (Կոսովոյի ուժեր) և Saber Junction (Միաձուլված սուր) զորավարժություններին: Հարցը սակայն, թե ինչու է Հայաստանի անունը հայտնվել, իսկ հետո հանվել, մնում է բաց։
Եվ սա երկրորդական հարց չէ, քանի որ այն բոլոր դեպքերում առաջացնում է տեղեկատվական ալիքներ, որոնք խթանում են տարբեր քաղաքական շահարկումներ ու խաղարկումներ։ Եթե տեղի ունեցածը թյուրիմացություն է, ապա ո՞վ է դրա պատասխանատուն, Հայաստանու՞մ է, թե՞ ԱՄՆ-ում։ Եթե տեղի ունեցածը քաղաքական ցածրորակ կոմունիկացիայի հետևանք է, ապա դարձյալ պետք է լինի պատասխանատու, քանի որ բոլոր դեպքերում այդ ամենը ազդում է Հայաստանի պետական քաղաքական վարկի վրա։ Ինչ վերաբերում է բուն մասնակցության խնդրին, ապա այստեղ առանցքային արձանագրումը թերևս այն է, որ Հայաստանն իհարկե պետք է ձգտի առավել սերտ գործակցել եվրաատլանտյան անվտանգային բևեռի հետ, որը անխոս առաջատարն է այդ հարթությունում, հետևաբար ունի ահռելի փորձ, որը անհրաժեշտ է հատկապես խորքային համակարգային արդիականացման հրամայական ունեցող հայկական ԶՈւ համար։
Միաժամանակ, ուզենք, թե` ոչ, պարտավոր ենք հաշվի առնել Ռուսաստանի զգայունության հանգամանքը, հետևաբար զուգահեռ ինտենսիվ աշխատել այդտեղ Մոսկվայի համար կենսական վախեր թույլ չտալու ուղղությամբ։ Հայաստանին բազմավեկտոր արտաքին-անվտանգային քաղաքականությունը պետք է եղած անկանխատեսելի համաշխարհային միջավայրում մեզ` ներառյալ Արցախին սպառնացող ռեգիոնալ ռիսկերը կառավարելու, այլ ոչ թե նոր ռիսկեր ավելացնելու համար։ Այո, ի տարբերություն մեկ, երկու, երեք տասնամյակ առաջ եղած միջազգային իրադրության, այսօր բազմավեկտորության խիստ բարակ լարի վրայով քայլելն առավել քան բարդ է, բայց էլ ավելի անհրաժեշտ։ Հենց դա է, որ Հայաստանը կառավարող ուժից պահանջում է քաղաքական խիստ լրջմտություն և հմտություն, Հայաստանի անվտանգային կենսական հրամայականները համաշխարհային պատերազմի կողմերին համոզիչ և փաստարկված ներկայացնելու, ըստ այդմ երկդիմի խաղի կամ առավել ևս ճամբարափոխության կամ վեկտորափոխության անհարկի և վտանգավոր մեղադրանքների, շահարկումների որևէ հիմք և առիթ չտալու համար։
