ՆԱՏՕ-ն Հնդկաստանին առաջարկել է համագործակցել հակահրթիռային պաշտպանության ոլորտում, հայտնում է The Times of India թերթը: Պարբերականի տվյալներով, Հյուսիսատլանտյան դաշինքի երկրներն առաջարկել են Նյու Դելիին փոխանակվել տեղեկություններով, որը ստացվել է ՀՕՊ համակարգի գործարկման ժամանակ: ՆԱՏՕ-ի ներկայացուցիչները նշել են, որ համագործակցությունը կօգնի ապահովել Դաշինքի անդամ երկրների և Հնդկաստանի անվտանգությունը, քանի որ Հնդկաստանը նկատում է այնպիսի վտանգներ, որոնք չի նկատում Դաշինքը, և ընդհակառակը: Բացի այդ, բարեհաջող համագործակցության պարագայում ՆԱՏՕ-ում խոստացել են Հնդկաստանին տրամադրել պաշտպանական տեխնոլոգիաներ:
Ներկա պահին Հնդկաստանն ունի միջին և կարճ հեռավորության համար նախատեսված հակահրթիռային համակարգեր: 2016թ.-ին զինվորականները պլանավորել են ավարտել բալիստիկ հրթիռի ստեղծումը, որն ընդունակ կլինի խոցել հակառակորդի հրթիռները 5000 կիլոմետր հեռավորության վրա: Ըստ թերթի՝ Նյու Դելին պլանավորում է շարունակել գոյություն ունեցող հրթիռների գործարկումը, որպեսզի հայտնաբերեն նոր համակարգի բացթողումները:
Հնդկաստանի հիմնական գործընկերը պետք է դառնա ԱՄՆ-ը: Ամերիկյան ՀՕՊ համակարգը, որն ընդունակ է պաշտպանել երկրի ամբողջ տարածքը միջմայրցամաքային հրթիռներից, համարվում է ՆԱՏՕ-ի բոլոր երկրների շարքում ամենաժամանակակիցն ու արդյունավետը: Հնդկաստանը դարձել է երկրորդ երկիրը, որին ՆԱՏՕ-ն առաջարկել էր համագործակցել:
2010թ.-ի նոյեմբերին Ռուսաստանն ընդունել է Հյուսիսատլանտյան դաշինքի հետ համագործակցելու առաջարկը, սակայն մինչև այսօր որևէ համաձայնություն չի կնքվել: Ռուսաստանն առաջարկում է ստեղծել է ՀՕՊ միասնական համակարգ, իսկ ՆԱՏՕ-ն երկու առանձին համակարգեր, որոնք միմյանց հետ տեղեկություններ են փոխանակելու:
