Ադրբեջանական Trend լրատվական գործակալության փոխանցմամբ՝ Ադրբեջանի նախագահի աշխատակազմի հասարակական-քաղաքական հարցերի վարչության պետ Ալի Հասանովը «հերյուրանք» է անվանել Ադրբեջանին առնչվող WikiLeaks-յան բացահայտումները.
«Վկայակոչելով ամերիկյան դիվանագետներին՝ WikiLeaks-ը տարածում է «անհիմն» տեղեկատվություն, ինչն ուղղված է տարածաշրջանի տարբեր երկրների միջև լարվածություն առաջացնելուն։ Մենք բազմիցս հերքել ենք նմանատիպ տեղեկատվությունը։
Մասնավորապես, եղել են հաղորդագրություններ, որոնք ուղղված են եղել Ադրբեջանի և Թուրքիայի հարաբերությունների վատթարացմանը։ «Կեղծ» տեղեկատվություն է տարածվել նաև Ռուսաստանի և Իրանի մասին Ադրբեջանի ղեկավարության հայտարարությունների վերաբերյալ։ Այդ ամենը «կեղծիք» է, և մենք մնում ենք մեր կարծիքին»։
Հիշեցնենք, որ WikiLeaks-յան հրապարակումներում նշված էր, որ 2010 թվականի փետրվարի 25-ին Ադրբեջանի նախագահ Իլհամ Ալիևի և ԱՄՆ փոխպետքարտուղար Բիլ Բըրնսի միջև կայացած հանդիպման ժամանակ Ալիևը հայտարարել է, թե չի ցանկացել, որպեսզի Թուրքիան վերածվի էներգետիկ (տարանցիկ) միջանցքի, ինչի համար էլ գազային պայմանագիր է կնքել Ռուսաստանի հետ.
«Մենք այս պայմանագիրը կնքեցինք «մեր թուրք բարեկամներին» ցույց տալու համար, որ Թուրքիային թույլ չենք տա վերածվելու գազաբաշխիչ կենտրոնի»։ Թուրքական Milliyet թերթն այս կապակցությամբ գրեց. «Ալիևը խոցեց մեր սիրտը»։
Պետք է հիշել, որ դրանից առաջ՝ 2009 թվականի հոկտեմբերի 15-ին, Բաքվում ռուսական «Գազպրոմը» և SOCAR-ը պայմանագիր ստորագրեցին ադրբեջանական գազի գնման շուրջ։ Դրանով Ադրբեջանը պարտավորվում էր 2010 թվականի հունվարի 1-ից տարեկան նվազագույնը 500 միլիոն խորանարդ մետր գազ առաքել Ռուսաստան:
