Ձեզ ենք ներկայացնում է «Առաջին լրատվական»-ի ընթերցողներից մեկից ստացված նամակը, որում խոսվում է պետավտոտեսչության ներկայացուցչի հերթական անօրինականության մասին:
«Կիրակի օրը՝ ժամը 15:00-ի սահմաններում, ընկերոջս մեքենայով շարժվեցինք «Մարկո Պոլո» ռեստորանի դիմացի ավտոկանգառից, և ընկերս, որը մեքենայի ղեկին էր, ցանկանում էր ամրացնել իր անվտանգության գոտին։ Հենց այդ պահին Արամի փողոցից նկարում պատկերված 386 ՈՍ 01 պետհամարանիշով պետավտոտեսուչի մեքենան կանգնեցրեց մեզ: Բացատրեցինք, որ հենց նոր էինք շարժվել, և վարորդը ամրացնում էր գոտին, սակայն նրանք ասացին, որ պետք էր դա նախօրոք անել, և վարորդին տուգանեցին 5000 դրամով, որը տեղում մուծեցինք: Հետո, երբ պատրաստվում էինք շարժվել, նկատեցի, որ երկու տեսուչներից և ոչ մեկը գոտին չի ամրացրել: Նորից մոտեցա նրանց մեքենային և հարցրի, թե իրենք ինչո՞ւ գոտին չեն ամրացրել։ Պատասխանեցին՝ հեսա կամրացնեն (ի դեպ, նրանք իրենց բավական լկտի էին պահում): Նստեցի մեքենան, և հրապարակով շարժվեցինք Նալբանդյան փողոցի ուղղությամբ: Երբ կանգնած զիջում էինք Վ. Սարգսյան փողոցից եկող մեքենաներին, նույն մեքենան կողքից մոտեցավ մեր մեքենային և տվեց վարորդի փաստաթղթերը, որոնք մոռացել էինք իրենց մոտ: Նկատեցի, որ նրանց գոտիներն ամրացված չեն: Ասացի. «Ձեր գոտիներն ամրացված չեն, կարելի՞ է ձեզ նկարել»: Նրանցից մեկը սկսեց լկտի ու կեղծ,- հավանաբար վախից,- ծիծաղել՝ ասելով. «Հա, նկարի, ապեր, նկարի», իսկ մյուսը, որը ղեկին էր նստած, ասաց. «Կարո՞ղ ա՝ մի հատ էլ բռնել տաս, ընգեր»:
Հիմա ես երկու հարց եմ ուղղում Ալիկ Սարգսյանին.
– Դուք գողակա՞ն համակարգի պետ եք, թե՞ ոստիկանական։ Եթե ոստիկանական՝ ապա ինչո՞ւ են Ձեր ղեկավարած համակարգի բարձրաստիճան ներկայացուցիչներն առաջնորդվում գողական օրենքներով:
– Այս միջադեպը հրապարակելով՝ ես բռնե՞լ եմ տալիս տեսուչներին, թե՞ ոչ: Եթե այո՝ ապա բռնող ո՞վ է, Ալիկ Սարգսյա՞նը, այսինքն՝ Դուք: Ինչպես հասկացա նրանց տագնապից՝ այո՛, քանի որ Դուք իսկապես շատ խիստ հայացք ունեք:
Միայն խնդրում եմ՝ պատասխանելիս անկեղծ լինել, ո՛չ անցած անգամների նման, այս անգամ իսկապե՛ս անկեղծ:
Հ.Գ. Անպայման հետևելու եմ, որ այդ տեսուչները հեռացվեն աշխատանքից, իսկ մնացածներին խորհուրդ կտամ հետևել օրենքներին, թե չէ «բռնել կտանք»:
Հակոբ Արշակյան»։
