Առնվազն 750 հազար մարդ Սոմալիում կարող է մահանալ սովից: Այս մասին հայտարարել է ՄԱԿ-ը` զգուշացնելով, որ առաջիկա ամիսների ընթացքում սպասվում է, որ իրավիճակը՝ կապված երաշտի հետ, կարող է էլ ավելի վատանալ: Կազմակերպության տեղեկություններով` Սոմալիի մեկ այլ նահանգ` Բեյը, պաշտոնապես դարձել է սովի գոտի: Տարածաշրջանում մոտ 12 միլիոն մարդ ունի սննդի կարիք: Այս մասին հաղորդում է BBC-ն:
Ինչպես հայտնել է ՄԱԿ-ի տեխնիկական խորհրդական Գրեյն Մոլոնեյը, իրավիճակը Բեյում ամենալուրջն է: «Երեխաների շրջանում թերսնվածների թիվը հասնում է 85%-ի: Սա թերսնվածության ռեկորդային ցուցանիշ է»,- ասել է նա` հավելելով, որ Սոմալիում կրիտիկական վիճակում են գտնվում մոտ 4 միլիոն մարդ, որոնցից մոտ 750 հազարը կարող է մահանալ արդեն առաջիկա 4 ամիսների ընթացքում, եթե միջազգային հանրության կողմից համապատասխան արձագանք չլինի:
Հիշեցնենք, որ Աֆրիկայի արևելյան շրջաններում աննախադեպ երաշտի պատճառով մի քանի տասնյակ միլիոն մարդ Ջիբութիում, Եթովպիայում, Էրիտրեայում, Քենիայում և Ուգանդայում սննդի կարիք ունեն:
