Գետի հունի փոփոխության աշխատանքները (որի վրա գտնվում է Թռչկանի ջրվեժը) թափով շարունակվում են: Ընդ որում`ոչ միայն ջրվեժն է վտանգված: Գետի հունը տեղափոխվում է չգիտես ուր, և այդ հատվածում ջրային ամբողջ ավազանն անապատանում է:
«Առաջին լրատվականի» հետ զրույցում դարձյալ ահազանգ հնչեցրեց հաղորդավար Նվեր Մնացականյանը, ով երեկ է վերադարձել Թռչկանից: «Ամբողջ ցավն այն է, որ դա աչքից շատ հեռու է արվում: Զբոսաշրջիկներ կային այնտեղ: Այդ մարդիկ ի՞նչ են մտածում, որ գալիս-տեսնում են` մի երկու օրից այդ գետը չի լինելու: Ջրվեժի վերևի հատվածից գետը կտրում են, գետը գնալու է լրիվ ուրիշ հունով, դա էլ է ցամաքելու»,- ցավով ասաց նա:
Հիշեցնենք, որ մի քանի շաբաթ առաջ դարձյալ Նվեր Մնացականյանն ու բանաստեղծ Ռազմիկ Դավոյանը «Առաջին լրատվականի» հետ զրույցում ահազանգ հնչեցրին Մեծ Պարնի գյուղի մոտ գտնվող Թռչկանի ջրվեժի շուրջ ընթացող շինարարության վերաբերյալ: Շինարարության նպատակը ջրվեժի վերացմամբ հիդրոէլեկտրակայանի կառուցումն է:
Հայտնի է, որ մեր հրապարակումներից հետո բնապահպանության նախարար Արամ Հարությունյանը, ծանոթանալով «Ջրվեժին ձեռք տալը մեծագույն հանցագործություն է բնության դեմ» հոդվածին, հանձնարարել էր տեսչական ուսումնասիրություն անցկացնել խնդրի առթիվ և իրեն զեկուցել փորձաքննության արդյունքը։ Նախարարության մամուլի պատասխանատու Հասմիկ Մկրտչյանը հավաստիացրել էր, որ նախարարը հետևողական է լինելու այս հարցում։
Հ.Մկրտչյանը մեզ հետ զրույցում ասաց, որ հետաքննության արդյունքում իրենք պարզել են, որ շինարարություն իրականացնելու համար առկա են բոլոր օրինական փաստաթղթերը, այսինքն`«շինարարությունն օրինական» է: Փաստորեն, մեր երկրում հնարավոր է այս կամ այն եղանակով ձեռք բերել շինարարությունն օրինականացնող փաստաթղթեր ու ամեն գնով հասնել գետի ու ջրվեժի ցամաքեցմանը:
Թե որքան օգուտ կտա հիդրոէլեկտրակայանն իր տերերին՝ հայտնի չէ, բայց որ դրանով անդառնալի ոչնչացվում է Հայաստանի կենդանական ու բուսական աշխարհի մի կտորը՝ փաստ է: Լավ կլիներ, որ պաշտոնյաները մինչ փաստաթղթեր տրամադրելը գոնե մեկ անգամ այցելեին ջրվեժ ու հասկանային` ինչի տակ են ստորագրել ու ինչի կառուցմանն են համաձայնություն տվել:
