WikiLeaks կայքում օրերս հայտնված ամերիկյան գաղտնի նամակագրության փաստաթղթերից մեկն անդրադարձել է 2008թ. Մարտի 1-ից հետո ստեղծված «ՀԻՄԱ» երիտասարդական նախաձեռնությանը: Փաստաթուղթը թվագրված է 2008թ. մայիսի 29-ով:
«Մարտի 1-ից սկսած «ՀԻՄԱ»-ն կազմակերպել է մի շարք աչքի ընկնող ակցիաներ, որոնք պահանջում էին քաղաքական բանտարկյալների ազատ արձակում, խոսքի և հավաքների ազատություն, օրենքի գերակայություն: Նախաձեռնության բողոքի որոշ ակցիաներ ներառում էին բանտարկյալների շորերով երթը գլխավոր դատախազության առաջ` բերանները կապած վիճակում, կամ ընդդիմադիր թերթերի բաժանում խորհրդարանի շենքի դիմաց»: ԱՄՆ դեսպանատունը Պետքարտուղարությանը ներկայացրել է «ՀԻՄԱ»-ի ներգրավվածությունը բնապահպանական ակցիաներին, այդ թվում` Թեղուտի անտառում հանքավայրերի շահագործման դեմ իրականացվող գործողություններին:
Փաստաթղթում անդրադարձ կա «ՀԻՄԱ» երիտասարդական նախաձեռնության հիմնադիրներից մեկի` Արսեն Խառատյանի վրա կատարված հարձակմանը, որը տեղի էր ունեցել մայիսի 28-ին: Նշվում է, որ Արսենի վրա հարձակումը դրան նախորդող մեկ շաբաթվա ընթացքում կառավարությանն ընդդիմացող հասարակական գործիչների վրա կատարված երրորդ հարձակումն էր: ԱՄՆ դեսպանատան աշխատակցի հետ հանդիպման ժամանակ Արսեն Խառատյանն ասել է, որ «ՀԻՄԱ»-ն ոչ մի քաղաքական կուսակցության կամ առաջնորդի չի ենթարկվում: Լևոն Տեր-Պետրոսյանի խորհրդականները դեսպանատան աշխատակցի հետ հանդիպման ժամանակ ասել են, որ թեպետ «ՀԻՄԱ»-ն հետապնդում է իր նպատակները, իրենց ճամբարի հետ համագործակցություն եղել է:
Անդրադառնալով նախաձեռնության երիտասարդներին՝ փաստաթղթում նշվում է, որ նրանք ֆինանսապես ապահովված են և տնտեսապես չէ, որ շահագրգռված են մասնակցել այս նախաձեռնությանը:
