Վրացական GHN լրատվական գործակալության փոխանցմամբ՝ Վրաստանի փոխարտգործնախարար Նինո Կալանդաձեն երկուշաբթի օրը տեղի ունեցած ավանդական ճեպազրույցի ժամանակ հայտարարել է, որ Աբխազիայում տեղի ունեցած նախագահական ընտրությունների ժամանակ Լեռնային Ղարաբաղի պատվիրակության աբխազական այցը չի արտացոլում պաշտոնական Երևանի դիրքորոշումը.
«Երևանի դիրքորոշումը մեզ հայտնի է։ Հայաստանն աջակցում է Վրաստանի տարածքային ամբողջականությանն ու ինքնիշխանությանը և չի ճանաչում Աբխազիայում տեղի ունեցած ընտրությունները։ Այնպես որ, ոչ մի հիմնավորում չկա այդ ամենը կասկածի տակ առնելու համար։
Լեռնային Ղարաբաղի պատվիրակությունն Աբխազիայի նախագահական ընտրություններում ներկա է եղել որպես դիտորդ»։
Հիշեցնենք, որ օգոստոսի 26-ին Աբխազիայում տեղի ունեցած արտահերթ նախագահական ընտրություններում հաղթել է Ալեքսանդր Անկվաբը՝ առաջին փուլում հավաքելով քվեների 54.9 տոկոսը։ Աբխազիայի նախագահական ընտրություններն անօրինական են որակել Ադրբեջանի ԱԳՆ-ն, ԱՄՆ Պետդեպարտամենտը, Եվրախորհրդարանը, ՆԱՏՕ-ն։