Հնագիտության ինստիտուտի Արտաշատի արշավախմբի ղեկավար Մկրտիչ Զարգարյանը «Ինքնություն» հաղորդաշարի շրջանակում «Առաջին լրատվական»-ին պատմել է վերջին մի քանի տարիներին Արտաշատի 13-րդ բլուրի պեղումների մասին։ Նրա խոսքով՝ 13-րդ լուրը, չնայած իր համեստ բարձրությանը, շատ հետաքրքիր տեղեկատվություն է մեզ տրամադրում՝ սկսած ուրարտական ժամանակաշրջանից, այսինքն՝ Արտաշատի սահմաններում 8-7-րդ դարից, մինչև քաղաքի գոյության վերջին շրջանները:
«Մենք ունենք առնվազն 3 խոշոր տիպարային բլոկներ, բավականին մեծ տարածք գրավող և կառուցված բացառապես նույն շինարարական տեխնիկայով և նախագծային մեթոդներով: Հետաքրքիր է նաև այն հանգամանքը, որ բացի իմ ասած տիպարային բնակելի կառույցներից, ստորին շերտերում մենք բացահայտեցինք շատ հետաքրքիր հանրային, չեմ ուզում ասել պաշտամունքային, մի կառույց, որն ունեցել է առանձնահատուկ ներքին հարդարանք, շատ ճոխ քիվերով՝ բավականին հաստ կրաշաղախով ձուլած: Դրա մի հատվածը հրկիզվել է: Այդ բոլոր մանրամասները մենք հետագա ուսումնասիրությունների ընթացքում կփորձենք բացահայտել ու տեղակայել այդ հնագիտական տեղեկատվությունը պատմական զարգացումների շրջանակում: Բայց արդեն իսկ մենք ունենք եզրահանգումների մի շատ հետաքրքիր շարք, որոնք թույլ են տալիս վերհանել քաղաքի պատմության մի շարք նշանակալի ու հետաքրքիր հատված»,-ասել է հնագետը:
