Թուրքական Ankara լրատվական գործակալության փոխանցմամբ՝ Իսրայելի նախկին վարչապետ Էհուդ Օլմերթն անդրադարձել է թուրք-իսրայելական հարաբերությունների կտրուկ վատթարացմանը։ Ըստ Օլմերթի՝ Թուրքիան Իսրայելի թշնամին չէ.
«Նախկինում մեզ հաջողվել է բարդ իրավիճակում կայունացնել մի շարք երկրների հետ մեր հարաբերությունները։ Նույնը կարելի է անել հիմա՝ զսպվածության, սառնասրտության և սթափ մտածելակերպի միջոցով։
Թուրքիան Իսրայելի թշնամին չէ, Իսրայելն էլ Թուրքիայի թշնամին չէ։ Նախկինում Թուրքիան մեզ համար կամրջի դեր էր կատարում, որի օգնությամբ իրականացրել ենք չափազանց կարևոր ու զգայուն շփումներ։ Այսուհետ ևս կարող է այդպես լինել»։
Հիշեցնենք, որ Էհուդ Օլմերթն Իսրայելի վարչապետի պաշտոնը վարել է 14.04.2006 – 31.03.2009 ժամանակահատվածում։ Նրա վարչապետության ժամանակ Թուրքիան միջնորդի դեր էր ստանձնել Իսրայելի և Սիրիայի միջև։ Սակայն 2008 թվականի վերջին Գազայի հատվածում Իսրայելի ձեռնարկած ռազմական օպերացիան թուրք-իսրայելական հարաբերություններում առաջին լուրջ ցնցման պատճառ հանդիսացավ։
