Ուկրաինացիները, որոնք Լիբիայում ներկայանում էին որպես խոհարարներ և նավթարդյունաբերական ոլորտի մասնագետներ, հնարավոր է՝ դիպուկահարներ են: Այս մասին հաղորդում է Associated Press գործակալությունը` հղում անելով լիբիացի ապստամբներին:
«Ինչպե՞ս մենք կարող ենք դիպուկահարներ լինել: Ձերբակալվածները կամ շատ ծեր են, կամ կանայք են»,- գործակալությանն ասել է խոհարար Մաքսիմ Շադրովը, որին ձերբակալել են նավթարդյունաբերական համալիրում: Ուկրաինացիներին ձերբակալած ապստամբների հրամանատարն ասել է, որ իրենք ապացույցներ դեռ չունեն, որ ձերբակալվածները դիպուկահարներ են, սակայն հավելել է, որ ռիսկային քայլ է նրանց ազատ արձակելը:
Հիշեցնենք, որ Քադաֆին իր սպասարկող անձնակազմին վարձում էր արտասահմանից: Հայտնի է, որ նրա բուժքույրերը նույնպես եղել են Ուկրաինայից, որոնք սովորաբար Լիբիայի առաջնորդին «պապոչկա» էին անվանում:
