Ադրբեջանի կողմից Արցախի Հանրապետության շրջափակման հետևանքով մի շարք հարկ վճարողներ դադարեցրել են իրենց գործունեությունը, ինչն իր անդրադարձն է ունեցել բյուջե մուտքագրված հարկերի և եկամուտների վրա։ Արցախի ՊԵԿ-ի պաշտոնական կայքում հրապարակվել են նախորդ ամսվա ընթացքում պետական բյուջե մուտքագրված հարկերն ու եկամուտները։ Նախնական տվյալներով՝ 2023 թվականի հունվար ամսվա ընթացքում ԱՀ պետական բյուջե են մուտքագրվել 1,902.3 մլն դրամ հարկային եկամուտներ և տուրքեր, որոնք պլանավորված 2,800.0 մլն դրամ ցուցանիշի նկատմամբ կազմել են 67.9 տոկոս կամ պակաս 897.7 մլն դրամով:
Հավաքագրված եկամուտները նախորդ տարվա նույն ժամանակահատվածի համեմատ թերակատարվել են 28.5 տոկոսով, կամ պակաս է հավաքագրվել 758.9 մլն դրամ: «Պլանային առաջադրանքի և նախորդ տարվա նույն ժամանակահատվածի համեմատ թերակատարումները պայմանավորված են 2022 թվականի դեկտեմբերի 12-ից Ադրբեջանի կողմից Արցախի Հանրապետության շրջափակման հետևանքով տնտեսությունում ստեղծված իրավիճակով, մասնավորապես, մի շարք հարկ վճարողների գործունեությունների դադարեցմամբ, որի հետևանքով իրացման շրջանառություն և դրան համարժեք հարկային պարտավորություններ վերջիններիս մոտ չեն առաջացել և, ըստ այդմ, բյուջե չեն մուտքագրվել»,- տեղեկանում ենք ԱՀ ՊԵԿ-ից։