2011թ. հունվար-հունիսին ՀՀ տնտեսության իրական հատվածում օտարերկրյա ներդրումների հոսքերի ծավալը կազմել է 421 մլն 900 հազար դոլար, որը 2010թ. նույն ժամանակաշրջանի համեմատ աճել է 28.8%-ով, որից ուղղակի ներդրումների ծավալը կազմել է 349 մլն 500 հազար դոլար և աճել 58.6%-ով: Հիմնային մետաղների արտադրության ոլորտին է բաժին հասել օտարերկրյա ներդրումների 39%-ը: Այս մասին տեղեկանում ենք ՀՀ ԱՎԾ հրապարակումից:
Օտարերկրյա ներդրումների հոսքերի ծավալի մեջ զգալի մասնաբաժին ունի Ռուսաստանը, որի աճի տեմպը կազմել է 76.8%` 206 մլն 619 հազար դոլար:
Օտարերկրյա ներդրումների ծավալով երկրորդը Ֆրանսիան է` 68 մլն 114 հազար դոլար ցուցանիշով, ընդ որում՝ այստեղ գրանցվել է 3.3%-ի նվազում:
ԱՄՆ ներդրումները ՀՀ-ում աճել են 2.8 անգամ` կազմելով 19 մլն 526 հազար դոլար: Աճի ամենամեծ տեմպը գրանցվել է Միացյալ Թագավորությունից կատարված ներդրումների ծավալում` 8.5 անգամ` կազմելով 3 մլն 921 հազար դոլար:
