ՄԱՀՀԻ ղեկավար Ստյոպա Սաֆարյանը ֆեյսբուքյան իր էջում գրել է.
Ես հասկանում եմ, որ Արցախի պետ նախարար Ռուբեն Վարդանյանը օբյեկտիվ ու սուբյեկտիվ բնույթի լիքը կաշկանդող հանգամանքներ ունի։ Բայց չի կարելի հայտարարություններ անել, որոնց անգամ մենք չենք կարող, կներեք, լուրջ ընդունել։ Ահավասիկ, պատասխանելով Լաչինի միջանցքը բացելու ռուս խաղաղապահների պայմանագրային իրավասության-պարտավորության մասին Նիկոլ Փաշինյանի հայտարարության մասին հարցին, նա ասել է․
«Երկրի ղեկավարն է, իր կարծիքն է, իր որոշումն է։ Ես կարող եմ համաձայն լինել կամ` ոչ։ Ընդունել եմ ի գիտություն»,- հայտարարել է Արցախի պետնախարար Ռուբեն Վարդանյանը՝ անդրադառնալով ՀՀ վարչապետ Նիկոլ Փաշինյանի այն հայտարարությանը, որ Լաչինի միջանցքը ՌԴ խաղաղապահների վերահսկողության ներքո է եւ նրանք պետք է բացեն այն։ Ճշտող հարցին՝ ընդունո՞ւմ է, որ ՌԴ խաղաղապահները պետք է միջանցքը բացեն, Ռուբեն Վարդանյանը պատասխանեց․ «Ճանապարհը պետք է բացեն երկրների ղեկավարները եւ միջազգային հանրությունը, որովհետեւ անընդունելի է նման իրավիճակը։ Բոլոր մարդկանց կարեւորությունն աշխարհում կարեւորում եմ։
Մենք պայքարում ենք, եւ դա մեզ իրավունք է տալիս սա պահանջելու նաեւ ուրիշներից»։
Վերջին հատվածն ուղղակի գերազանցում է բանականության բոլոր սահմանները․ “Ճանապարհը պետք է բացեն երկրների ղեկավարները եւ միջազգային հանրությունը, որովհետեւ անընդունելի է նման իրավիճակը։”
Գոնե այս հատվածն ասած չլիներ, մի կերպ կուտվեր մնացածը։ Լինել գիտակից մարդ, գիտակցել, որ թղթի վրա գրված է, որ Լաչինի միջանցքի անվտանգությունն ապահովում է Ռուսաստանը, իսկ հաղորդակցության անխափանությունը երաշխավորում է Ադրբեջանը, ու դրանից հետո ասել, թե ճանապարհը պետք է բացեն “երկրների ղեկավարները ու միջազգային հանրությունը”, կներեք, վիրավորանք է դիմացինի բանականությանը․․․
Ի վերջո կարելի է միջազգային հանրության ու մնացած երկրների դերի մասին այլ կերպ ասել, բայց ոչ թե այս ամենի համար պատասխանատու երկու երկրի խնայել, քարն էլ նետել միջազգային հանրության ու մյուս երկրների բոստանը․․․
Միջազգային հանրությունը մի հատ էլ ռուս խաղաղպահների համար ձեռքի մեջ ձվածեղ չանի՞․․․․