ԵԱՀԿ-ում ԱՄՆ-ի մշտական ներկայացուցիչ Մայքլ Քարփենտերը թվիթերյան գրառմամբ անդրադարձել է Լաչինի միջանցքի ազատ տեղաշարժի շարունակվող արգելափակմանը: Իր գրառման մեջ դեսպան Քարփենտերը, մասնավորապես, ասել է.
«Միացյալ Նահանգները շարունակում է մտահոգված լինել ավելի քան երեք շաբաթ Լաչինի միջանցքի արգելափակված լինելու կապակցությամբ, որը ստեղծում է ծանր հումանիտար իրավիճակ։ Շնորհակալություն ենք հայտնում Միջազգային Կարմիր Խաչ կազմակերպությանը այս ընթացքում կարևոր օգնություն ցուցաբերելու համար, սակայն կոչ են անում Ադրբեջանին և Ռուսաստանին անհապաղ վերականգնել ազատ տեղաշարժը»:
Քաղաքագետ Ռոբերտ Ղևոնդյանի կարծիքով՝ կարևոր է արձանագրել, որ կոչն ուղղված է նաև Ռուսաստանին.«Մինչև հիմա մենք տեսնում էինք, որ բազմաթիվ կոչեր ուղղված էին միայն Ադրբեջանին։ Այնուամենայնիվ մենք հասկանում ենք, որ առանց Ռուսաստանի մասնակցության ադրբեջանցիները նման ակցիա չէին կարող իրականացնել, առավել ևս՝ երկու կողմից էլ այն հայերը, որոնք փորձել են ճանապարհն անցել, ադրբեջանցիներին չեն հանդիպել, հանդիպել են ռուսական խաղաղապահ զորախմբին։ Հիմա այս կոչը ադրբեջանցիների հետ հավասարապես վերաբերում է նաև Ռուսաստանին։ Միացյալ Նահանգները սրանով ցույց է տալիս, որ տիրապետում է իրավիճակին և հասկանում է, թե ով է այս իրավիճակի հիմնական հեղինակը, ինչ նպատակներով ու ինչ առանձնահատկություններ հաշվի առնելով է այս իրավիճակը ստեղծվել»,-«Առաջին լրատվական»-ի հետ զրույցում ասաց նա։
Ղևոնդյանի դիտարկմամբ՝ լավ կլիներ, որ ՀՀ կառավարությունը հիմք ընդունելով այդ կոչը, նույնպես դիմեր Ռուսաստանին, գոնե որոշակի պարզաբանում խնդրելու համար.«Օրինակ, թե ինչու է Միացյալ Նահանգները նշում նաև ձեզ, ո՞րն է ձեր դերակատարումը, ի՞նչ է անհրաժեշտ անել։ Այսինքն՝ հանրային մակարդակում, որովհետև ավելի փակ ձևաչափով, նման հարցադրումներ ու խոսակցություններ եղել են։ Դրա մասին բազմաթիվ պատահաբար սպրդած գործոններ ու տեղեկություններ կան։ Լավ կլիներ, որ հանրային մակարդակում ևս Հայաստանը Ռուսաստանին հարց ուղղեր, ինչը ենթադրում եմ, կարող էր գործը տեղից շարժելու հնարավորություն դառնալ»,-նկատեց նա։
Դիտարկմանը, որ վերջին շրջանում պաշտոնական Երևանը պարբերաբար բարձրացնում է այս հարցում Ռուսաստանի պատասխանատվության հարցը, մեր զրուցակիցն արձագանքեց.«Մեկ հարց է խոսել Ռուսաստանի պատասխանատվության մասին ու մեղադրել Ադրբեջանին, մեկ այլ իրավիճակ է, երբ Ռուսաստանին ինքնին հարց է ուղղվում իր դերակատարության մասին, ոչ թե խնդիրը լուծելու, այլ ստեղծելու դերակատարության տեսանկյունից։ Սրա հիմքերը ԵԱՀԿ-ում ԱՄՆ ներկայացուցիչը տվել է և սրա վրա հենվելով Հայաստանը կարող է իրավիճակը ձևավորելու հետ կապված հարցեր ուղղել Ռուսասատնին։ Հանրային մակարդակում Ռուսաստանի պատասխանը ևս հնարավորություն կտար գործընթացները հետագայում ևս ավելի արդյունավետ ուղղով տանել»,-ասաց քաղաքագետը։
Մեր այն հարցին, արդյոք ԱՄՆ-ի կոչը, հորդորը կարող է իրավիճակ փոխել, եթե Վաշինգտոնը սահմանափակվի միայն այդքանով, Ռոբերտ Ղևոնդյանը պատասխանեց. «Իհարկե իրավիճակ փոխվում է։ Մեկի մասին ես արդեն նշեցի՝ դա այն է, որ Հայաստանը կարող է հենվել այդ կոչի վրա ու խոսակցությունն այլ հարթություն տեղափոխել Ռուսաստանի հետ։ Բացի այդ՝ այդ կոչերն ու հորդորները, ենթադրում եմ, որ միայն երևացող մասն են։ Մեծ հավանականությամբ, սրանց նախապատրաստման ու հանրայնացման փուլում, ավելի փակ ձևաչափերով աշխատանքներ են իրականացվում, որոնց արդյունքը մենք գուցե կարճ ժամանակ անց տեսնենք»,-եզրափակեց նա։
