Ռուսական հակաօդային պաշտպանության համակարգերը խոցել են ուկրաինական անօդաչու թռչող սարքը, որը մոտեցել է Սարատովի մարզի «Էնգելս» ռազմական օդանավակայանին: Ըստ ՌԴ Պաշտպանության նախարարության՝ 3 զիծառայող զոհվել է: Այս մասին հաղորդում է «Интерфакс» գործակալությունը:
«Դեկտեմբերի 26-ին Մոսկվայի ժամանակով մոտ 01:35-ին (Երևանի ժամանակով 02:35-ին), Ռուսաստանի օդատիեզերական ուժերի հակաօդային պաշտպանության համակարգերի կողմից ցածր բարձրության վրա խոցվել է ուկրաինական անօդաչու թռչող սարք, որը մոտենում էր Սարատովի մարզի «Էնգելս» ռազմական օդանավակայանին: Անօդաչու թռչող սարքի բեկորների ընկնելու հետևանքով օդանավակայանում գտնվող տեխնիկական անձնակազմի երեք ռուս զինծառայողներ մահացու վիրավորվել են: Ավիացիոն տեխնիկան չի տուժել», – հայտնել են ՌԴ ռազմական գերատեսչությունից:
Իր հերթին Սարատովի նահանգապետը հայտնել է, որ Էնգելս քաղաքի բնակելի թաղամասերում արտակարգ միջադեպեր տեղի չեն ունեցել, քաղաքից բնակիչների տարհանման կարիք չկա, քաղաքացիական ենթակառուցվածքները չեն տուժել։
BBC-ի ռուսական ծառայությունը հաղորդում է, որ Կիևում ռուսական «Էնգելս» ռազմական օդանավակայանում տեղի ունեցած պայթյունները Ռուսաստանի գործողությունների հետևանքն են:
«Սա հետևանքն է այն ամենի, ինչ Ռուսաստանն անում է մեր հողում: Եթե ռուսաստանցիները կարծում էին, որ խորը թիկունքում պատերազմի հետ ոչ ոք չի առնչվի, սխալվում էին», – ասել է Ուկրաինայի ԶՈւ ռազմաօդային ուժերի հրամանատարության խոսնակ Յուրի Իգնատը:
Նա հավելել է, որ պայթյունների իրական հետևանքների մասին հնարավոր կլինի խոսել միայն մի քանի օրից, երբ հայտնվեն օդանավակայանի արբանյակային լուսանկարները:
Ըստ ականատեսների հաղորդումների՝ այս գիշեր Էնգելս քաղաքի օդանավակայանի մոտ պայթյուն կամ մի քանի պայթյուններ են տեղի ունեցել:
Ուկրաինական անօդաչուներն առաջին անգամ չէ, որ հարվածում են «Էնգելս» ռազմական օդանավակայանին: Դեկտեմբերի 5-ին ՌԴ Պաշտպանության նախարարությունը հայտարարել էր Սարատովի և Ռյազանի «Էնգելս» և «Դյագիլևո» ռազմավարական ավիացիայի օդանավակայանների մերձակայքում ուկրաինական անօդաչու թռչող սարքերի խոցման մասին։ Բեկորների ընկնելու և պայթյունի հետևանքով 3 ռուս զինծառայող զոհվել էր, 4-ը՝ վիրավորվել, 2 ինքնաթիռ վնասվել էր:
