Հայաստանի չեմպիոն ️«Փյունիկի» սեփականատեր Արթուր Սողոմոնյանը պատասխանել է դեկտեմբերի 19-ի ՀՖՖ-ի հայտարարությանը։ Հիշեցնենք, որ դեկտեմբերի 16-ին Սողոմոնյանը ակումբի պաշտոնական կայքին տված հարցազրույցում անդրադարձել էր ՀՖՖ գործունեությանը, անվստահություն էր հայտնել ՀՖՖ նախագահ Արմեն Մելիքբեկյանին և պահանջել էր նրա հրաժարականը։
«Եթե ՀՖՖ-ն ապացուցի, որ իմ բերած փաստերում, բարձրաձայնած խնդիրներում սխալվում եմ, առանց դատական հայցի էլ ներողություն կխնդրեմ: Ինձ այս ամենը չի վախեցնում, հակառակը, ապացուցում է, որ ես ճիշտ եմ իմ պնդումներում: Ֆեդերացիայի նախագահի պաշտոնին չեմ հավակնում, զուտ ցանկանում եմ, որ իմ կարծիքը լսեն ու հարգեն:
Երբ գործ ես ունենում պրոֆեսիոնալ մարդկանց հետ, բարձրաձայնած խնդիրներին պատասխանում են փաստերով և փաստարկներ են առաջ բերում, իսկ երբ գործ ես ունենում ոչ պրոֆեսիոնալների հետ, դժգոհություններին կամ բարձրաձայնած խնդիրներին ի պատասխան սկսում են քեզ վիրավորել, սպառնալ:
Հայաստանի ֆուտբոլի ֆեդերացիան գնում է երկրորդ ճանապարհով: Սկզբում սկսեցին ինձ վիրավորել, ապա դատարկ սպառնալիքներ հնչեցնել իմ հասցեին: Նրանց որդեգրած այս քաղաքականությունը այն բանի ապացույցն է, որ ինչի մասին ես խոսել եմ, ինչ խնդիրներ ներկայացրել եմ, հաստատվում է:
Դեռևս որեւէ փաստ, տրամաբանություն չեմ տեսնում նրանց հայտարարություններում: Նրանք ինձ սպառնում են՝ քրեական գործ հարուցելով, փորձում են դատարանի միջոցով հասնել իմ հրապարակային ներողությանը, ինչն ինձ համար շատ անհասկանալի է: Եթե սխալ լինեմ, մեծ սիրով ներողություն կխնդրեմ:
Ես ծախսում եմ իմ գումարները, եկել եմ հայկական ֆուտբոլ՝ այն զարգացնելու ցանկությամբ: Եթե նրանք ինձ ապացուցեն, որ իմ բերած փաստերում, բարձրաձայնած խնդիրներում սխալվում եմ, առանց դատական հայցի էլ ներողություն կխնդրեմ. նույնիսկ ուրախ կլինեմ, եթե ես սխալվեմ:
Ինչ վերաբերում է նրանց գործ հարուցելու սպառնալիքին, ինձ համար իսկապես անհասկանալի է: Նրանք սպառնում են մի մարդու, որը նրանց վստահության քվե է տվել ֆեդերացիան ժամանակավոր ղեկավարելու համար: Ուղղակի աբսուրդ է: Սպառնալիքների փոխարեն ավել լավ կլիներ ինձ հետ խոսեին փաստարկներով. ասեին՝ այս ինչ հարցում համամիտ չենք, մյուս հարցում համակարծիք ենք, կաշխատենք, կշտկենք իրավիճակը: Այսպիսի երկխոսություն դեռեւս մեր եւ ֆեդերացիայի միջեւ չկա:
Ես ավելի եմ համոզվում, որ մենք ճիշտ ենք՝ պահանջելով Արմեն Մելիքբեկյանի հրաժարականը: Մենք դա կանենք նաև ֆեդերացիայի ժողովում և մեծ հույս ունեմ, որ մեր ձայնը լսելի կլինի նաև ֆեդերացիայի մյուս անդամների կողմից:
Երբ Հայաստանի առաջնությունը լքեց չորս մարզային թիմ, նրանք հայտարարեցին, որ հեռանում են ՀՖՖ ղեկավարության հետ աշխատանքից դժգոհ լինելու պատճառով: Այդ ժամանակ նրանց որևէ մեկը չաջակցեց, այդ թվում՝ «Փյունիկը»: Մենք միայն հայտարարություն տարածեցինք, որ ափսոսում ենք նրանց հեռանալու կապակցությամբ:
Հիմա եմ հասկանում եմ, որ պետք է ավելի մեծ աջակցություն ցուցաբերեինք այդ ակումբներին: Այժմ էլ մենք ենք կանգնած այդպիսի փաստի առաջ, քանի որ դժգոհ ենք ֆեդերացիայի ղեկավարության գործունեությունից:
Արմեն Մելիքբեկյանի ղեկավարության արդյունքում 4 մեծ ակումբ հեռացավ: Այժմ ՀՖՖ-ն պատերազմ է հայտարարել «Փյունիկին»: Շուտով կլինի ՀՖՖ գործկոմի ընտրությունը և Արմեն Մելիքբեկյանն ամեն ինչ կանի, որպեսզի թույլ չտան մեր ներկայացուցիչի ընտրությունը գործկոմի կազմում։ Իմ տեղեկություններով ՝ հիմա արդեն ակտիվ աշխատանք է տարվում այդ ուղղությամբ։
Մենք նրանց վստահության քվե էինք տվել, իսկ այժմ բարձրաձայն հայտարարում եմ, որ վստահության քվե այլևս չենք տալիս: Ես իմ հարցազրույցում դեռ ամեն ինչ չեմ ներկայացրել և մանրամասնել: Հարկ եղած դեպքում ավելի կմանրամասնեմ՝ որպես ակումբի սեփականատեր»,- ասել է Սողոմոնյանը News․am -ին տված հարցազրույցում։