ԱՄՆ-ում ԼՂՀ առաջին ներկայացուցիչ Արտեմ Հարությունյանը, այսօր լրագրողների հետ հանդիպման ժամանակ խոսելով 20-ամյա անկախ Արցախի մասին, ասաց, թե Արցախը իր օրինակով ցույց տվեց, որ հայ ժողովրդի մեջ վիթխարի ներուժ կա:
Հարությունյանը նկատեց, որ, չնայած երկրաշարժին, շրջափակմանը, առանց կազմակերպված բանակի, ազգը մի մարդու պես ոտքի կանգնեց. «Մեր տղաները, մեր ժողովուրդը, կոշտձեռք գյուղացու տղան, քաղաքի տղան մեկ մարդու պես ոտքի ելան, և մենք կարողացանք մեր սրբազան հայրենիքի հիմնական հատվածներից մեկը հետ վերցնել օկուպանտի ձեռքից»:
Արտեմ Հարությունյանի խոսքերով, Ղարաբաղը սոսկ բառ չէ, այլ վիթխարի խթան է, և անգամ 20 տարի անց էլ հայ ժողովրդի ամենասևեռուն ուշադրության կենտրոնում է. «Առանց Ղարաբաղի՝ մենք կզրկվեինք մեր թթվածնից: Որոշ քաղքենիներ ասում են, թե մեր ինչին էր պետք էս Ղարաբաղը, ապշեցուցիչ է, այդ մարդիկ հաց ու պանրից և ստամոքսի որոշ սեկրեցիաներից դենը բան չեն տեսնում»:
Գնահատելով Ղարաբաղի ներկայիս օրը՝ Արտեմ Հարությունյանը նշեց, որ Ղարաբաղն այսօր կանոնավոր բանակով կենդանի մի օրգանիզմ է և հայության համար կենսական նշանակություն ունի:
Հարությունյանը նկատեց, որ այսօր պետությունը պետք է մեծ ուշադրություն դարձնի Արցախի անկախության համար զոհվածների ընտանիքներին. «Էդ ոնց է՝ մի օլիգարխ սարքում է 2 միլիոնանոց առանձնատուն, ի՞նչ է, հնարավո՞ր չէ այնպես անել, որ այդ գումարները որպես օգնություն տրվեն նահատակների ընտանիքներին»:
