ԿԲ-ն որոշել է բարձրացնել վերաֆինանսավորման տոկոսադրույքը 0.25 տոկոսային կետով՝ սահմանելով 10.75%, Հայաստանի Հանրապետության կենտրոնական բանկի կողմից տրամադրվող լոմբարդային ռեպոյի տոկոսադրույքը` 12.25%, Հայաստանի Հանրապետության կենտրոնական բանկի կողմից բանկերից ներգրավվող միջոցների տոկոսադրույքը` 9.25%:
2022թ. նոյեմբերին 12-ամսյա գնաճը նվազել է և կազմել 8.8%: 12-ամսյա բնականոն գնաճը ևս նվազել է՝ կազմելով 9.9%:
Այս առնչությամբ, tvyal.com կազմակերպության ղեկավար, ՀՊՏՀ դոցենտ տնտեսագետ Աղասի Թավադյանը «Առաջին լրատվական»-ի հետ զրույցում նշեց, որ նախ պետք է հասկանալ, որ բարձր վերաֆինանսավորման տոկոսադրույքը սահմանափակում է ԿԲ գործառույթները ֆինանսական շուկայում, ինչպես նաև բացասական է անդրադառնում տնտեսվարողների վրա. «Դա նաև նպաստում է դրամի որոշակի ամրացմանը։ Արտահանման վրա սա բացասական ազդեցություն ունի։ ԿԲ-ն նման քաղաքականությամբ շարունակում է խթանել ոչ միայն գնաճի զսպումը, այլ նաև դրամի արժևորումն է խթանումը և, այսպես ասած, տնտեսության սառեցումը, որովհետև բարձր վերաֆինանսավորման տոկոսադրույքը դժվարացնում է փողի շրջանառությունը տնտեսությունում»,-ասաց նա:
Բացի այդ, ըստ Թավադյանի, պետք է հասկանալ, որ ոչ միայն համաշխարհային գնաճն է խնդիրը, այլև այն վերջին մեկ տարվա ընթացքում ահռելի դրամական միջոցներ են եկել Հայաստան, հիմնականում Ռուսաստանից. «Վերջին մեկ տարվա ընթացքում նաև մեծ ծավալի կապիտալ է եկել Հայաստան, քանի որ Ռուսաստանը պատժամիջոցների արդյունքում մեծ կապիտալ է դուրս մղել: Այս պահին համեմատած ամառվա ժամանակատվածի, գնաճը 9 տոկոսի սահմաններում է և իմաստ ունի վերաֆինանսավորման տոկոսադրույքը ոչ թե բարձրացնել, այլ իջեցնել, որը կխթանի տնտեսությունը, որոշակիորեն կարժեզրկի դրամը, կամ դոլարի փոխարժեքը հասցնել մոտավորապես 430 դրամի և դրանով խթանել արտահանումը հատկապես ԵՄ»,-ընդգծեց Թավադյանը:
Նա նկատեց, որ հատկապես ԵՄ երկրներ արտահանողները որոշակի խնդիրներ ունեն. «Հայաստանում գնաճը պայմանավորված չէ ներքին դրամավարկային գործոններով, առաջին հերթին դրա վրա ազդեցությունն ունի համաշխարհային գնաճը: Երկրորդ ցուցանիշը, որ ազդեցություն ունի գնաճի վրա, եղանակն է: Որքան եղանակը վատ եղավ, որքան արտերը քիչ բերք բերեցին, գները կբարձրանան: Իսկ ԿԲ-ն տոկոսադրույքը բարձրացնելով, գնաճը զսպելու վրա այդքան էլ մեծ ազդեցություն չի ունենում։ Հետևաբար, գտնում եմ նպատակահարմար, որ ԿԲ-ն վերաֆինանսավորման տոկոսադրույքը նվազեցներ, որ թե բարձրացներ»,-ընդգծեց նա:
