Rosbalt.ru-ի փոխանցմամբ՝ այսօր հրապարակվել է նախորդ տարվա մայիսի 31-ին գրանցված «Մավի Մարմարա»-ի միջադեպին առնչվող ՄԱԿ-ի զեկույցը։ Զեկույցում նշված է, որ իսրայելական հատուկջոկատայինները Գազայի հատվածի մատույցներում «Ազատության նավատորմ»-ի գրավման ժամանակ կիրառել են չափազանց և ոչ նպատակահարմար ուժ։
Դրա հետ մեկտեղ նշվում է, որ իսրայելցի զինվորականները բախվել են «ուղևորների խմբի կազմակերպված ու կոշտ դիմադրությանը»,- ինչի համար էլ ստիպված են եղել ինքնապաշտպանության նպատակով ուժ կիրառել։ Այնուամենայնիվ, զեկույցի հեղինակներն այդ ուժը որակում են որպես «չափազանց և ոչ նպատակահարմար»՝ ընդգծելով, որ մարդկանց սպանությունն անընդունելի է։
Զեկույցում Թուրքիայի կառավարությունը մեղադրվում է «Ազատության նավատորմ»-ի կազմակերպմանը խոչընդոտելու հարցում շատ ջանքեր չթափելու համար։ Դա մասնավորապես վերաբերում է IHH «իրավապաշտպան» կազմակերպությանը, որը նախաձեռնել էր «Ազատության նավատորմ»-ի կազմակերպումը։
105 էջից բաղկացած այդ զեկույցը պատրաստվել է դեռևս մի քանի ամիս առաջ, սակայն դրա հրապարակումը բազմիցս հետաձգվել էր այդ միջադեպից հետո Իսրայելի ու Թուրքիայի հարաբերությունների կարգավորման փորձերի պատճառով։
Հիշեցնենք, որ թուրքական կողմը բազմիցս հայտարարել է, որ եթե Իսրայելը Թուրքիայից ներողություն չխնդրի մինչև «Մավի Մարմարա»-ի միջադեպի վերաբերյալ ՄԱԿ-ի զեկույցի հրապարակումը, ապա Թուրքիան Իսրայելի նկատմամբ գործի է գցելու նախապես մշակած «Բ» պլանը։ Վերջինս կազմված է երեք բաղկացուցիչ մասերից.
ա) իրավական պայքար – Թուրքիան «Մավի Մարմարա»-ի միջադեպի ժամանակ իսրայելցի զինծառայողների գործողությունների դեմ դիմելու է միջազգային դատարան։
բ) երկկողմանի հարաբերություններ – Թուրքիան պատրաստվում է նվազեցնել Իսրայելի հետ դիվանագիտական շփումները՝ ընդհուպ մինչև հարաբերությունների խզում։ Թուրքիան կարող է չընդունել Իսրայելի նորանշանակ դեսպանին։ Հարված կհասցվի նաև թուրք-իսրայելական տնտեսական հարաբերություններին։
գ) Գազայի հատված – Եթե Իսրայելը չվերացնի Գազայի հատվածի շրջափակումը, ապա Թուրքիան պատրաստվում է միջազգային բոլոր հարթակներում քաղաքական պայքար մղել Իսրայելի դեմ։
