Ազգային ժողովը երկրորդ ընթերցմամբ ընդունեց «Զինվորական ծառայության և զինծառայողի կարգավիճակի մասին» օրենքում փոփոխություններ և լրացումներ կատարելու մասին կառավարության նախագիծը։ Նախարար Սուրեն Պապիկյանը, ինչպես պաշտպանության և անվտանգության հարցերի մշտական հանձնաժողովի նիստին էր ասել, նորից կրկնեց, որ ներդնում են շարքային և սպայական կազմերի պարտադիր զինվորական ծառայությունից պայմանագրային զինվորական ծառայության անցման նոր համակարգ, և այն զինվորական ծառայության գրավչությունն ու շահագրգռվածությունը բարձրացնելու նպատակ ունի։
Նախագծին կողմ քվեարկեց նաև «Հայաստան» խմբակցությունը։ Խմբակցության ղեկավար Սեյրան Օհանյանը լրագրողների հետ զրույցում նշել է, որ «Պաշտպան հայրենյաց» ծրագիրը «Ես եմ» համակարգի շարունակությունն է, որն այս իշխանություններն ամբողջությամբ քանդեցին։
Օհանյանը կողմ քվեարկելը հետևյալ կերպ հիմնավորեց․ «Մենք «Պաշտպան հայրենյաց»–ին կողմ ենք քվեարկել, քանի որ ժամկետային ծառայությունից պայմանագրային ծառայողների քանակը համալրելու ծրագրին մենք կողմ ենք։ Այդ գաղափարը երկար տարիների պատմություն ունի։ Դեռևս 2010 թվականից սկսվել է քննարկումը և կարող եմ ասել` պայմանագրային ծառայության և զինված ուժերի համալրման այսպիսի գործընթացները մի քիչ ուշացած են»:
Այս նոր ծրագիրը ներդրմամբ՝ կառավարությունը դադարեցնում է 2018 թվականից գործող «Ես եմ» ծրագիրը, որն ընդունվել էր նախկին իշխանությունների օրոք։
«Գոյություն ունեցող համակարգն այսօր չի բավարարում մեր երկրի առջև ծառացած մարտահրավերներին, և մենք սահմանում ենք ավելի բարձր նշաձող՝ պայմանագրայինը պետք է ունենա ավելի բարձր պատրաստվածություն և ավելի բարձր կարողոգիւթյուն, և պրոֆեսիոնալ բանակը ենթադրում է, որ մեր բանակի զինվորները պետք է ունենան ավելի բարձր ստանդարտներ և ավելի բարձր սոցիալական ապահովություն», – նշեց Պապիկյանը։
Այս առնչությամբ ԱԺ պաշտպանության և անվտանգության հնձնաժողովի փորձագետ Արծրուն Հովհաննիսյանը «Առաջին լրատվական»-ի հետ զրույցում նշեց, որ «Պաշտպան հայրենյաց» ծրագիրը պրոֆեսիոնալ բանակի անցնելու քայլերից մեկն է. «Պրոֆեսիոնալ բանակի ճանապարհին սա կարևոր քայլ է, և ցանկալի է, որ այդ պրոցեսը շարունակական լինի, որովհետև պրոֆեսիոնալ բանակի կազմավորման ճանապարհին բազում այլ քայլեր կան, ինչպես օրենսդրական, այնպես էլ միջգերատեսչական, կազմակերպչական հարցեր: Ռազմական գիտության և ժամանակակից բանակի չափորոշիչների հստակ պահանջներին համապատասխան քայլերի ամբողջություն է պետք, մի քանի տասնյակ քայլեր կան, որոնք պետք է իրար հաջորդեն, զուգորդվեն, որպեսզի ստանանք լավ, պրոֆեսիոնալ բանակ»,-ասաց նա:
Հարցին, թե արդյոք այս փոփոխություններն ուշացած չե՞ն, Արծրուն Հովհաննիսյանը պատասխանեց. «Զինվորականներն ուզում են, որ ամեն ինչը միանգամից ստացվի: Ես էլ եմ այդպես կարծում, որ ամեն ինչ կարելի է միանգամից անել, բայց ցավոք, հաճախ բազում խոչընդոտներ են լինում՝ բյուրոկրատական, ֆինանսական, պետական, մեր պարագայում նաև արտաքին քաղաքական»:
Ինչ վերաբերում է նրան, թե արդյոք «Պաշտպան հայրենյաց» ծրագիրը և դրա իրագործումը զերծ կմնա շահարկումներից, փորձագետն արձագանքեց. «Ես արդեն 20 տարուց ավելի առնչություն ունեմ բանակի հետ, ցավոք սրտի, բանակին ու անվտանգությանը վերաբերող քննարկումների մեջ ես դեռ երբեք պրոֆեսիոնալ քննարկումներ չեմ տեսել: Ավելի շատ քաղաքական ենթատեքստ է տրվում: Ես ականատես եմ բացառապես, աննշան բացառություններով, ռազմական գիտության, ռազմական ոլորտի հետ որևէ աղերս չունեցող, զուտ անձնական, քաղաքական շահեր հետապնդող գնահատականների, քննարկումների, դեմ և կողմ հանդես եկողների: Ես չեմ տեսել նորմալ քննադատություն, որի հիմքում դրված լինեն ռազմական գիտության պահանջներն ու չափորոշիչները»: